Advertisement

清唱《浮誇》全場high爆 陳奕迅Boxing Day加碼送《沙龍》

本地
2022.12.27
撰文:齊森
whatsapp-image-2022-12-27-at-3-35-01-pm-8
Eason在talk位時被觀眾熱情打動,即場清唱《浮誇》!

陳奕迅(Eason)在紅館舉行的《Fear and Dreams》演唱會,昨晚(26日)進入第14晚,周秀娜、193及肥仔;湯令山及女朋友Moon等亦有來支持。昨晚適逢Boxing Day,Eason在talk位時被觀眾熱情打動,即場清唱《浮誇》,歡呼聲震爆紅館。

whatsapp-image-2022-12-27-at-3-35-01-pm-7

來到talk位時,Eason以自己鼓勵大家:「好似跳舞咁,你哋都得㗎,我排舞時同dancers跳,佢哋叫我做啲動作,我覺得自己好核突,哈哈,所以我排舞唔望鏡㗎,從來唔知自己跳成點,隻腳又粗額頭又闊,哈哈哈,但係既然我都做得,我鼓勵大家,一齊同我跳!記住!做任何事最緊要係有態度!記住! 唔好唔型、唔好俾韓國人型晒先得㗎!你睇我唱《浮誇》時,佢哋嗰啲樣……」然後他扮出一個目瞪口呆樣子,全場觀眾即拍掌歡呼並大叫要唱《浮誇》。Eason笑道:「其實我唱得好差呀,其實我咪嘴㗎成個騷……」不過觀眾並沒有放過他,繼續狂叫,終於打動到他:「好啦,好啦!老實講佢哋(樂隊)冇練㗎,有冇我隻CD呀?播出來俾我對嘴啦,哈哈哈!算啦,既然你哋咁想聽,唉,Christmas Special唱幾句啦,聽日話你聽,冇啦下,你班友!但係我依家唔唱,聽日點交待?個個拿住部電話喺度拍,一陣又話我唱錯,我聽日又俾人話啦,死啦,點交待!哈哈哈!」接着樂隊用一隻琴伴着他清唱了《浮誇》一小段,作為給觀眾的一份Boxing Day大禮。

 

來到安歌環節,Eason揀了《還有甚麼可以送給你》,觀眾又再不肯離場,終於叫了15分鐘之後,Eason再度出場,再送多首《沙龍》給觀眾,不過他亦同時宣布, 28號已經不再是聖誕節 Special Day,演唱會會返回正常軌道。

陳卓賢 星級企業大獎2020 姜濤
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹