麥玲玲在無綫劇集《法言人》飾演貴婦白小姐，昨晚的一集獲Tony仔（容天佑飾）一招「彎腰救美」，技驚四座。曾獲《功夫新星》香港區頭三名的天佑笑言：「又唔係特別難嘅，因為無論如何我都要一定接住玲玲姐，接唔到就大鑊。不過玲玲姐身手超級靈敏，著住高踭鞋咁樣彎腰落嚟都難佢唔到，果然厲害。」玲玲姐則笑言最怕「責親」天佑：「其實事前試位試咗好耐，佢有叫我放心責落佢度。天佑又真係幾有功架，佢本身有練過吓拳同功夫，所以反應係幾好。」
另外天佑昨晚再度表演「大腳趷起」，為配合劇情需要收放自如，他坦言「伸縮腳」確有難度：「將腳踢出去就容易，踢出去唔碰到目標都唔難，最難係要隻腳已經出咗去，然後唔俾你伸直，夾硬抽返番嚟嗰吓就超級辛苦，就好似你想打噴嚏，但係又打唔出嗰吓感覺，好唔爽。」
之前玲玲姐在網絡引發不少迴響的名牌手袋昨晚終於出場，更足足獲得兩個close up，笑言過足戲癮。為了認真做好白小姐，所有手袋及服裝均是私伙，套裝更全部開劇前已找設計師度身訂造。問到所有私伙總值，玲玲姐則笑言：「拍嘢要認真啲，個角色係有錢人，冇理由求其著，但呢啲唔係講錢嘅，最緊要符合個角色。」玲玲姐續指所有帽子，均由服裝間同事幫忙配襯。玲玲又笑指其私伙手袋在拍攝現場大受歡迎：「大家一見到啲袋就好興奮，我仲講笑叫馬明（馬國明）買一個俾靚湯（湯洛雯），佢話千祈唔好：『佢一定以為我做錯事』，好搞笑。」
