為香港奪得兩面銀牌的女飛魚何詩蓓，昨日下午時間坐飛機凱旋回港，其兩項游泳皆破了亞洲紀錄。女飛魚除咗游水叻，學業方面成績一樣咁嬌人，而且仲彈得一手好鋼琴！除咗何詩蓓，原來香港以下幾位女運動員一樣都係文武雙全高學歷。
被網民封為「微笑劍后」嘅江旻憓（Vivian），係香港劍擊隊嘅主將，有唔少媒體指Vivian外貌與台灣藝人林志玲相似，因而Vivian亦喺台灣爆紅。
江旻憓曾代表香港喺仁川亞運會同雅加達亞運會贏得兩面銅牌；2019年喺擊劍世界盃古巴站同巴塞隆納站女子銳劍項目奪得金牌。江旻憓學業成績同樣唔錯，2012年喺國際文憑大學預科課程（IBDP）中考獲41分（45分滿分），成功考入美國知名高等學府史丹福大學，修讀國際關係學士學位，其後喺中國人民大學攻讀法律碩士，今年9月將就讀香港中文大學，攻讀法律博士課程（J.D.）。
陳芷澄（Tiffany）喺香港首位出戰LPGA（女子職業哥爾夫球巡迴賽）哥爾夫球運動員，2016年代表過香港出戰里約奧運，被視為香港高爾夫球壇嘅icon。
陳芷澄中學時期就讀拔萃女書院，其後到美國升學，先後入讀過社區學院及州際學院，之後轉校至美國頂尖大學南加州大學。
佘繕妡係香港劍擊代表出戰東京奧運中最年輕嘅一位，佘繕妡早於15歲已經打出成績，喺2016年亞洲U23劍擊錦標賽上越級挑戰，喺女子重劍個人賽中奪銀牌。
佘繕妡早前喺東奧女子重劍團體賽後接受訪問時稱之後將到美國繼續學業，遺憾未能參與全運會。佘繕妡就讀嘅大學大有來頭，係全美排名前二十名嘅一流知名學府聖母大學。佘繕妡喺美國升學之後都有繼續參加劍擊賽事，更喺今年3月底舉辦嘅美國大學NCAA賽事中，勇奪個人賽銀牌。
何詩蓓繼日前為港隊摘下奧運銀牌後，再戰100米自由泳決賽並以52.27秒奪得個人第二面銀牌，打破亞洲100米女子自由泳紀錄時間，更創下奧運港隊一人奪得兩項獎項嘅紀錄。
何詩蓓除咗喺泳壇上嘅成績令人讚嘆，佢嘅學業成績都令人佩服。何詩蓓喺2015年中學文憑試（DSE）取得7科35分，包括通識教育5**、英文5*、數學5、企業會計與財務概論5、中文4、化學4及英語文學4， 獲世界頂尖的大學之一嘅美國密西根大學取錄，攻讀心理學。何詩蓓大學時期亦有加入大學泳隊，亦為校隊贏得唔少獎項何詩蓓。更因學業同運動表現卓越，獲頒美國大專十大聯盟榮譽獎牌（Medal of Honor），成為密芝根大學歷史上第3名獲此殊榮嘅游泳女將，更係首名獲得此榮譽嘅香港人。
圖片來源： 江旻憓、何詩蓓、佘繕妡、陳芷澄@Instagram
