Advertisement

李幸倪哽咽自覺愧對父母 抑鬱冇錢睇醫生靠自己撐過去

本地
2024.01.09
撰文:卡林
whatsapp-image-2024-01-09-at-7-54-03-pm-2
Gin帶拍攝團隊重回初來港住的北角舊居、大談當時的居住環境。

李幸倪(Gin Lee)最近擔任網上頻道「冤枉娛樂」節目《枉談》嘉賓,上集Gin分享自己的感情世界,而下集Gin帶拍攝團隊重回初來港住的北角舊居、大談當時的居住環境,提起愧對父母,向來予人感覺硬淨的Gin更忍不住落淚。Gin帶拍攝團隊由觀塘坐渡輪到北角,原來北角是Gin初來港發展時第一個住的地方,走到大廈樓下,Gin表示以前住頂樓,二百多呎的兩房單位,一間睡房、一間用作衣帽間,冬涼夏暖,由大門走到睡房,不過三步距離。她記得第一次父母來訪,媽媽看到她的居住環境,忍不住哭了出來,「佢哋攞咗兩個大篋,但望一望個地方,兩個人兩個篋係入唔到嚟,我阿媽就好心噏,喊咗。阿媽覺得唔慣,因為喺我哋家鄉(馬來西亞)每個人閒閒地都幾千呎,佢就會覺得原來咁大對比。」

 

當中亦發生不少被Gin視為的小趣事,「話說我阿媽有次發脾氣,因為每一次煮飯,佢都會撞到周身瘀晒,你知煮飯嘅人又熱又盛,一轉身又撞跌嘢、一轉身又撞親,成件事好唔聚財,佢就覺得,唉,好煩。」她續說:「有一次我阿媽坐咗喺梳化睇電視,我見到阿爸冇位企又冇位坐,佢就入咗我擺衫嗰間好亂嘅房,佢擺咗張摺櫈喺入面飲咖啡,個情景係好得意。我問佢:『你做乜喺裏面呀?』佢話:『我終於搵到個位坐啦。』」Gin謂當時覺得有地方住已經很開心,但對香港潮濕的氣喉不明所以,「我第一次見到啲牆係會滲水,啲衫晾咗三日都唔乾,我唔知點解,後尾fans話俾我知,『太濕啦你屋企!』佢哋好好,買咗部抽濕機俾我,我先知道原來香港係咁濕。」

 

隻身來港發展、一句廣東話也不會的Gin,亦經歷過一段黑暗時期,抑鬱症狀一一浮現,「完咗第一間公司,未簽第二間公司時,冇晒方向,又冇人脈,齋等,個過程好漫長。一天黑就喊,喊到天光,天黑開始驚,唔知點算好,我乜嘢都捉唔到,所有嘢都唔屬於我,我喺呢個地方做乜嘢?以為自己好有實力,但原來冇呀!好多呢種負面聲音。又冇錢、又唔敢同人講。迫到自己個情緒去到臨界點。我係feel到自己如果再唔掹返自己返嚟,我可能返唔到轉頭。」問到她有否求醫?她無奈說:「嗰陣時我冇去睇醫生,我都冇錢睇醫生,睇醫生好貴,山窮水盡啦,我剩返嘅錢一係要嚟買機票、一係要嚟食飯、一係交租,幾時排到睇醫生呢?」

whatsapp-image-2024-01-09-at-7-54-03-pm-7

從大學開始便已登台表演賺取學費、給家用的Gin回望這段日子,坦言覺得愧對父母,她強忍淚水,「心諗:『你咁大個女……自己嘅嘢都搞唔掂,又養唔到爸爸媽媽……』我屋企唔係窮,但我覺我大個女啦,我唔想爸爸媽媽咁辛苦……我嗰陣時好嬲自己,係因為我過到嚟香港,以為所有嘢會更好,但係所有嘢係變得好差,搞唔掂自己嘅嘢、又養唔到爸爸媽媽,我係咁怪自己。」慶幸的是最後Gin一一捱過,「我揀咗自己去撐,經歷過一個咁黑暗嘅時間,之後再遇到相似嘅問題,我唔係唔驚,但我有信心可以克服。」

聲夢傳奇 星級企業大獎2020 陳卓賢
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹