無綫台慶劇《新聞女王》， 昨晚（1日）焦點落在詩晴Cathy（高海寧飾）及曉薇（何依婷飾）。Man姐（佘詩曼飾）、佐治（馬國明飾）及飛爺（鄧智堅飾）同時收到富商鄭松柏離世消息，三方循律師、家庭醫生及茶客等不同方向追尋線索，縱有九成把握鄭伯死訊屬實，有人卻因不想負上錯誤報道的嚴重後果玩「推波」；進擊的Cathy於危急關頭「搶疆自薦」：「冇人敢報等我嚟吖！萬一touchwood報錯咪賴落我度咯，I have nothing to lose。我宗旨好簡單，the show must go on。我報，萬一報錯，對公司嘅損失先至係最細。」由於甚有guts，贏得一致好評，高Ling因而獲封「野心美女」：「不在意別人怎麼說，內心強大堅定！」、「好喜歡壞女人，就喜歡這種有野心的」、「實在太酷了，把野心和欲望寫在面上的女人！高海寧演的也太好，眼神高傲、挑釁、將野心表現得淋漓盡致」。
對於角色贏好評，高Ling謙虛歸功編審：「佢哋寫咗呢個好有血有肉，令人覺得壞得嚟好真誠嘅角色。好感恩好多網民都好欣賞詩晴，話佢又危險又迷人。」高Ling坦言自己也被詩晴吸引：「佢好孝順，你哋慢慢就會睇到，佢不擇手段坐主播位亦係有原因。佢表面上雖然好識得利用自己外在條件，例如拉拉鏈、送底褲，但佢有分寸之餘亦好有實力，就算要去應酬，佢朝早都係好早返office準備晨早新聞，呢個女仔係一心一意搞事業。」談到早前與曉薇VS的反枱戲引發熱話，高Ling透露於拍攝現場有被依婷感動：「我有戥佢慘，因為佢喊得好悽涼，佢喊戲做得好，而且喊極都有，我覺得佢呢方面好叻。」
在劇中飾演隸屬「佐治黨」的王偉、與高Ling及馬明在後續劇情有不少對手戲的林正峰，最近找數上載白tee健身照及白雪雪爆肌照；想不到平時予人感覺瘦削的林正峰，脫去白tee後相當健碩，無論胸肌及麒麟臂均相當驚人，林正峰留言：「你們居然來真的，好吧，我已經盡力了，你們想看的話就向左滑吧，正面就放過我吧，很害羞+醜樣，免得傷害你們眼睛」，引來網民驚嘆：「電視劇裏天天西裝，沒想到身材這麼好」。林正峰事後受訪時坦言爆肌之路是由接拍《新聞女王》開始：「嗰陣為咗套劇努力健身同埋戒口，幾個月減咗25磅，希望上鏡可以好睇啲，想畀人一種有別於過往嘅感覺。」
