Advertisement

打破非親生仔得獎慣例 周奕瑋解說「三冇主持」論│周奕瑋專訪

亞洲
2024.02.02
撰文:劉家倫攝影:鍾漢平

周奕瑋(Jarvis)近年獲無綫力捧做金牌司儀,去年台慶頒獎禮「單拖」上陣,表現淡定獲得網民一致讚好;入行十八年,今年終於首奪「最佳男主持」,上台得獎感言感動不少觀眾,Jarvis自嘲是「三冇主持」,引起網民討論。

原來在頒獎禮前,Jarvis由經理人合約轉至藝員合約,近年大台不再一味照顧「親生仔」,令頒獎禮的認可性增加;剛踏入40歲的Jarvis,工作自由度大增,未來希望不只「周遊」日本,真正向世界出發。

由初入行的娛樂新聞主播,打拚十八年,今年終於首奪「最佳男主持」。
由初入行的娛樂新聞主播,打拚十八年,今年終於首奪「最佳男主持」。

在頒獎禮前,周奕瑋在無綫官網「經理人合約藝員」一項中消失不見,只在「男藝人」一頁出現,與無綫變回普通關係,有網民賽前討論大熱的Jarvis仍有變數。

頒獎禮後Jarvis接受訪問,他說:「有些東西真係得到獎之後先夠膽講,今年其實都40歲人,如果話對自己信心唔係好大,我覺得會對唔住呢40年嘅人生。今年,相信係有史以來最接近呢個獎的一年,過多幾年,其實觀眾已習慣咗你嘅存在、習慣咗你嘅能力的時候,就冇咗嗰一下力,到最後攞到個獎座返屋企,如果要用一個keyword去形容,係圓滿。」有指今屆的獎座總值達到八十多萬港幣,Jarvis說:「我冇認真咁了解過值幾錢,因為無論個獎座值幾錢,都唔會拎去賣,家傳之寶㗎喇!」

whatsapp-image-2024-01-29-at-15-14-06-2

首奪「最佳男主持」,Jarvis上台得獎感言感動無數觀眾,他解說「三冇主持」的由來,「都好明顯啦!冇身形、冇外形、冇台型,首先我真係唔高吖嘛!又唔係特別上鏡,以前有認識一些公關朋友,因為他們有睇我做節目,有時有些活動將我個名擺入去試下,好多時聽返就係話我太細粒,個樣成個細路咁,我真係小朋友性格,你愈覺得我唔得,我就愈要做到,我要用一個我嘅方法行呢條路,當我迷失冇信心的時候,亦要提醒自己,無論我把聲、外形都係阿爸阿媽生俾我,我唔可以去否定自己。」

 

五強之中,有和Jarvis同期入行,同樣由娛樂主播出身的許文軒,宣布一刻,Jarvis百感交集,「當時有五部攝影機同時間拍緊五強,因為一張圓枱,對住我部cam影緊就係許文軒,我們係同期,由第一日娛樂新聞台開始,大家都在不同範疇去努力,宣布嗰一刻我情緒爆晒出嚟,我哋對望,腦入面就好似走馬燈咁,浮現好多一齊有喜有悲、有血有汗的畫面,原來大家都企咗十八年,真心講,我覺得佢將會愈來愈接近這個獎。」

Jarvis的努力,並不只是旅遊節目主持,去年在《萬千星輝頒獎典禮2022》獨挑大樑擔任司儀,表現備受讚賞,「好多謝志偉哥俾一個機會我,好罕有頒獎禮史上只有一位主持,嗰年台慶有20位,個個前輩都返晒嚟,去到頒獎禮,主題是『機會是留給追夢的人』,由開場到尾大家都聚焦在自己身上,對我來說,是一個好大好大的考試。」Jarvis的開場白要逐一講出台下演員的辛酸與經歷,事前要做足準備,記住很多藝員的資料,印象深刻是說到吳幸美做街訪被人多番拒絕,台下的幸美感動爆喊,曾志偉亦眼濕濕。

 

第一次到康城做影展,Jarvis著上一套「踢死兔」採訪紅地毯,當時竟被指似企鵝,令他更有決心做得更好。
第一次到康城做影展,Jarvis著上一套「踢死兔」採訪紅地毯,當時竟被指似企鵝,令他更有決心做得更好。

志偉十分看好Jarvis,尤其是2021年頒獎禮,志偉特別留意Jarvis和幸美兩位新主持的表現,「我好記得舊年他第一次叫我入房,然後話頒獎禮我想搵一個司儀去做,我呆一呆,之後佢話『我想你做,你有咩睇法?』第一下同佢講,我有信心做得到,但係我未有信心做得好,之後佢話,人就係咁樣一步一步行上去,好多時做完之後,先至發現原來你已經有信心做得好。」

當晚頒發「最佳劇集」時,Jarvis硬Cut林敏驄的發言,留時間給劇集幕後講得獎感言,贏得不少掌聲,Jarvis說:「大家當時個諗法都係一樣,而我亦知道over-run得好緊要,緊接就要播新聞報道,我係頒獎禮唯一可以控制到呢個場面的人,唔通叫個FM衝出嚟咩?其實我覺得驄哥好知道自己想講乜,都咁有經驗啦,嗰刻我只知道,cut就一定要cut,但點樣令到大家都舒服,我亦知道《下流上車族》導演關文深好用心拍咗呢套劇,付出了好多,想俾多些機會他和團隊講多謝,當然,好開心今年《新聞女王》佢再上台。今年在澳門的頒獎禮,事隔一年在後台與驄哥見面,我真係行埋去同佢講唔好意思,佢都仲記得我,佢講笑話『𡃁仔,你嗰陣打斷我講嘢喎!』」

變回藝員合約,Jarvis希望有更多時間製作新旅遊節目,做一個真真正正的旅遊達人。
變回藝員合約,Jarvis希望有更多時間製作新旅遊節目,做一個真真正正的旅遊達人。

訪問中,Jarvis亦承認已由經理人合約轉至藝員合約,他說:「其實對我來講分別真係唔大,對觀眾亦冇乜分別,過去好多年就算由《周遊東京》第一輯,捱過第二輯第三輯,咁繼續落去係點呢?會唔會可以有更加多呢?我唔可以次次都繼續所謂食老本,我要發掘更加多可能性。疫情令我諗清楚好多,原來咁容易就封咗個關,連香港去澳門都去唔到,我想睇個世界,唔淨只日本,呢個係我當時俾自己一個promise,我開YouTube Channel會去探索可能我都未去過嘅地方,想話俾人知,我係一個旅遊人,亦因為這個原因,令到我係想需要一個比較大少少的自由度,想運用自己的時間去發展更長遠的事業。」

 

服飾:LEEF Jewellery

場地:露營生活 @camplife23613

木村光希 車銀優 朴寶劍
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹