將於周日晚（16日）播出的《思家大戰》第三季，有張振朗率領的「靈戲逼人」隊，成員包括龔嘉欣、劉穎鏇、江欣燕和阮嘉敏，對戰由Gigi炎明熹大姑丈率領的「Gi朋戚友」隊，成員有細表哥細Y、表姐兼炎明熹後援會會長JY、表哥大Y和細姑丈Arwick。
今集氣氛熱鬧，「靈戲逼人」隊一班女隊員抬住振朗出場，相當架勢。振朗應李思捷要求預告劇情並驚爆：「丁一駿（其角色名）同女鬼好好感情，之後嘅劇情有機會係人同隻鬼生BB！」在旁的嘉欣聽畢忍不住吓了一聲！
「Gi朋戚友」隊則獲Gigi親臨現場支持打氣，戴着口罩的Gigi大曬招牌火星話：「大家都加油，我無話可說！」思捷問到有冇貼士俾大姑丈，Gigi再曬搞笑功說：「唔好咁緊張，今日你做Gigi。」之後大姑丈應思捷要求即場高歌，大姑丈獻唱Gigi的《好想約你》，Gigi聽後再放笑彈：「我以後都唔使唱歌喇，好勁呀！」
問答環節氣氛同樣熾熱，龔嘉欣上台搶答問題時、化身劇中女鬼雲柳芳，更鬼馬地匿在思捷身後嚇他，大曬可愛萌爆面。該隊全晚表現Hyper，每答對一條問題均會又跳又叫，分貝爆錶。在最後的「終極開口中」，今集有人在第一Round已拎到182分超高分數，表現非常亮眼。
