Advertisement

後梅迷傳承阿梅精神 「歷史不會被遺忘」|封面故事

本地
2023.12.29
撰文:文嘉龍攝影:伍敏慧

whatsapp-image-2023-12-28-at-8-07-20-pm-15除了《絕代芳華・梅艷芳》展覽,梅艷芳的歌迷會「芳心薈」早前亦有舉辦展覽活動,本周六(30日)更舉行一場紀念音樂會。

阿梅離世後,「後梅迷」現象誕生,不少年青歌迷都因為兩年前的電影《梅艷芳》,重新認識這一位天后,紛紛搜尋梅艷芳過去的經典形象與歌曲,其中有歌迷更主動電郵至歌迷會應徵做活動義工。今次訪問,四位後梅迷與兩位資深梅迷同場,大談往事與傳承,不約而同都說,要傳承阿梅台上專業的精神,不會被歷史遺忘。

後梅迷傳承阿梅精神 「她不希望被遺忘!」

今次訪問的四位後梅迷,最小年紀是位只有16歲的少年,「芳心薈」替他取了一個外號叫「Happy仔」。07年出生的他,16歲不追韓流不迷MIRROR,只愛梅艷芳。因為電影《梅艷芳》而迷上了,「其實我最鍾意嘅形象,係《烈焰紅唇》高衩形象,當年真係好前衛,即使擺喺依家睇,冇一個歌手會著到咁樣上台,佢真係好前衛、好時尚;戲入面嘅《胭脂扣》、《川島芳子》,嗰啲民國女人形象,佢舉手投足都好有女人味,係佢先展現得出嗰種民國feel。」

當同學們個個追韓星,Happy仔卻只愛梅艷芳,他坦言:「其實都幾怪,同學知道我鍾意梅艷芳,佢哋會覺得,我係咪唔同年代㗎?我哋去唱K,佢哋唱埋晒啲日本韓國,或者香港依家好hit嗰啲流行明星,但我就唱梅艷芳啲歌,我唱八、九十年代嘅歌,佢哋就講緊K-Pop、J-Pop,其實冇咗好多共同話題!」問到Happy仔的唱K飲歌,他說:「我最鍾意應該係《親密愛人》同《似是故人來》,我好鍾意呢啲抒情慢歌。」

學校找不到同好,好在「芳心薈」有不少後梅迷,其中由國內來港當管理學研究生的21歲Wendy,同樣因為電影《梅艷芳》而重新認識天后,今年特別為了阿梅逝世20周年的日子,而選擇留港,「我真的是因為她(梅)才來香港的,其實我有很多選擇,我可以去英國、去新加坡,有很多學校選擇,但今年是20周年,12月30日我一定要在香港的,如果去了其他國家很不方便,而且我是因為她,而喜歡上香港這個城市。」Wendy最愛阿梅《Larger Than Life》專輯,「我戴上耳機聽這張專輯的歌,我覺得像靈魂被穿透一樣,歌聲太好聽了,而她每個舞台都帶給我很多驚喜,怎麼會舉手投足都那麽有型呢?我很喜歡02年她與哥哥張國榮合作的《芳華絕代》,她一直在引領潮流,我覺得她的思想即使放到現在,都是非常的超前!」

留住香港文化足印

04年出生的Irene,都是因為電影《梅艷芳》迷上阿梅,「梅姐有幾首歌,我都好鍾意,例如《夕陽之歌》、《女人心》同《親密愛人》。梅姐嘅歌曲同形象,對流行文化有好大影響,好似髮型,我身邊就有一個朋友,佢都係鍾意梅姐,佢特登剪咗一個《壞女孩》造型嘅髮型,我就唔敢,我carry唔到!」另一位後梅迷Zoe,03年阿梅離世時,她才兩歲,她是因為家人愛聽黑膠,而接觸了梅艷芳的歌聲,更被梅艷芳在演唱會上的舞台形象震懾,「我本身唔係因為套電影認識梅艷芳,我屋企人好鍾意播黑膠,18、19年我屋企人睇返佢03年演唱會,我問邊個嚟?佢哋同我講,話佢好有毅力,我慢慢再睇返呢個演唱會,睇返佢網上資料,知道佢開演唱會嗰時有幾咁辛苦,我覺得佢呢個意志力好吸引我,同埋佢舞台上風格同魅力好吸引人!」

四位後梅迷,不能親睹阿梅真人台上風采,很多時都靠資深梅迷口耳相傳,Patrick與Eva兩位俱是「芳心薈」創辦人,Patrick最難忘大學畢業時,能與阿梅影合照,「阿梅自己唔係讀到好多書,所以好希望啲歌迷讀好書,可以保護到自己。我最開心畢業時等到Anita,我喺新蒲崗等佢彩排完出來,我等咗好耐幾個鐘,我特意同Anita講,我終於畢業,我可唔可以著住畢業袍同你影相,跟住佢好開心,佢笑住同我講,唔好驕傲呀!我覺得嗰一刻好warm,我知道佢都係好開心!」阿梅從來對待粉絲如朋友,還有一次有位歌迷不幸在外地過身,阿梅知道後,便問Eva有沒有那位歌迷的相片,原來阿梅要將照片帶回家,為那位離世歌迷唸經。

original-3今年是阿梅逝世20周年,資深梅迷同後梅迷,都希望可以將阿梅對流行文化的影響,繼續傳承下去,副會長Eva說:「Anita你離開咗20年,但我覺得你冇離開過,總之有咩事,我相信你一定會出現,所以我哋會繼續努力,傳承你嘅精神,我哋會延續佢嘅愛心!」Zoe說:「佢唔會因為離開咗20年而被人淡忘,我覺得係一件好事,我哋可以承傳落去,令更多人知道佢出現過,有啲人可能會被歷史遺忘,但佢唔會,佢真係有佢嘅魅力,令到我哋唔會遺忘佢!」

16歲的Happy仔則說:「我覺得佢嘅衣著,即使擺到依家都唔會過時,梅姐有『東方麥當娜』稱號,佢啲衫嘅設計真係好勁,同埋係佢先可以hold得住個啲形象!我好榮幸得到『後梅迷』呢個稱號,睇到依家有咁多後梅迷,證明香港流行文化仲未消逝。雖然梅姐已經逝去咗20年,但佢對流行文化影響,keep住被大家記得,呢個現象好好,證明留住咗香港文化一個足印。」他更引用阿梅的歌詞,「引用佢首《似水流年》,我哋依家外貌改變咗(外貌早改變),跟住處境都變咗(處境都變),但係我哋鍾意佢嘅情懷,係唔會變(情懷未變)。20年之後,依然有好多人鐘意佢,依家網上面都有好多關於佢嘅二次創作,我哋一班梅迷,應該都會喺未來路上,繼續去支持你!」

 

星級企業大獎2020 陳卓賢 姜濤
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹