曾於2014年拿下「叱咤樂壇我最喜愛男歌手」的張敬軒，今年再度入圍最後5強，競爭十分激烈，對手有尹光、姜濤、盧瀚霆和陳卓賢，位位都是大熱！軒仔今日（24日）在社交網為自己拉票：「大家嘅投入同埋通過實際行動嘅支持，令到我唔想再好似四、五年前嗰種佛系、等運到嘅狀態去迎接今次嘅頒獎禮，所以我都想為自己拉票。」他感謝大家及粉絲為他落力拉票，「多謝連日嚟為我拉票嘅各位朋友，睇見大家犧牲自己嘅休息時間，走遍大街小巷、喺街上、喺身邊嘅親戚朋友之中、喺網上為我取得嘅每一票，我都深深感恩！實在覺得自己就係最幸福嘅。」
軒仔直言在這兩年開始，發現其歌迷為了令他可以上到台，好努力好辛苦做好多好多支持他得獎活動和應援，「我有自己好好地咁樣思考過呢個現象，同埋我所應該採取嘅態度。作為一個入行廿二年嘅歌手，做出好嘅作品、喺台上面盡自己最大嘅努力去演出、唱好每一首歌、不斷檢討自己令自己更加進步、珍惜每一次當下嘅機會係我嘅本份，當中固然有鬆懈同卻步嘅時候，但係當我有少少吃力嘅時候，我嘅歌迷總係搵到去支持我嘅方式令到我再向前行多一步。今年叱咤前夕嘅拉票，我見到我嘅各位歌迷比往年更加落力，甚至犧牲寶貴嘅時間喺街上，出錢出力、冒住涼風、經歷各種平時生活中唔會遇到嘅尷尬為我拉票；又喺自己嘅朋友圈入面、各個電話群組之間，為我一票一票咁樣取得。當中投票俾我嘅雖然唔係全部都係我嘅歌迷，但係呢一份情義，已經無法用言語去形容我嘅感激同埋內心嘅激動。」
軒仔指在過去三年幾，因為大家支持，他舉行了合共59場演唱會：「如果我嘅歌聲、我嘅表演有感動過你嘅話，希望你可以為我喺下個星期一，投上我十分珍惜嘅一票，為我嘅2024年展開新嘅一頁。」另外他還率先預告明年一月份開始會有新歌推出及發行專輯大計，更會為歌迷會特別舉辦免費音樂會等資訊，相信軒仔明年依然忙個不停！
相片來源︰張敬軒@Instagram
