Advertisement

張敬軒戥Fans拋頭露面心噏內疚 半夜突發落旺角跟助選團一齊拉票

本地
2023.11.28
撰文:卡林
whatsapp-image-2023-11-28-at-8-41-05-pm
入選過16次我最喜愛男歌手五強的軒仔,在直播中落力為自己拉票!

張敬軒昨晚(27日)突發開IG live,除了剖析今年落力為自己在叱咜「我最喜愛的男歌手」拉票原因,更與fans聯播,為晚上11點仍然在街上為他拉票的fans打氣。直播完後,軒仔更決定親身落到旺角跟「助選團」齊齊派宣傳單張,為選舉奮鬥。軒仔在直播中謂,入選過16次我最喜愛男歌手五強,但只獲得一次,「講起上嚟好慚愧。」以往抱住「佛系」心態參選,但今年積極拉票,或多或少都受到過去幾年疫情的影響,「經過疫情,我啲fans、我啲觀眾互動方法唔同咗好多,自己都花咗一段時間去接受呢種韓式嘅應援,因為最主要唔想大家使錢、頻撲。」

whatsapp-image-2023-11-28-at-8-41-05-pm-7

軒仔分享有一晚在看IG時,見到fans包了一架巴士於港九新界巡遊,不論男女、又或是拖兒帶女為他走到街上拉票,「有啲人會好冷漠咁行過,見到呢幕我覺得好心噏。作為一個歌手,明明呢啲應該我自己去做,但要我啲fans咁樣拋頭露面,我覺得好內疚,所以我覺得唔可以再坐喺屋企入面,甚至乎萬一經過大家嘅努力真係送咗我上台嘅話,我覺得我會愧對大家。所以我決定要俾心機拉票!我真係冇辦法坐喺屋企坐享其成。」軒仔又介紹歌迷為他印製的宣傳物料,大讚他們十分「有心思」,「由於香港係一個多元嘅社會,所以我哋有菲律賓文嘅拉票單張、同埋有印尼文嘅拉票單張。」他又承諾在最後投票階段截止前,會不定時於全港的票站親身落區派傳單拉票,又笑謂:「希望大家可以當面拒絕我,但最好唔好,因為我覺得跳出咗我中年危機嘅comfort zone,同大家一齊以個運動員精神,去參與今次嘅樂壇頒獎禮。」

 

接着軒仔又跟仍在街上為他拉票的歌迷互動,有歌迷問他live完後會否過去找他們?然後全場起哄「落區!」軒仔自言「唔大得」,「你真係唔好大我呀,我話俾你聽,我個人就最唔鍾意人大我,好!我行路都過嚟!豈有此理!」直播結束後,軒仔心疼歌迷在晚上十一時多,仍在街頭為他落力拉票,於是決定到旺角跟fans一齊奮鬥。落到旺角,軒仔頓時被街坊包圍,他亦不停遊走派傳單,呼籲大家投他一票,場面墟冚,除了本地人,軒仔連外國人都不放過,「Please vote for me!」最後軒仔逗留到近十二點才離開。

陳卓賢 星級企業大獎2020 聲夢傳奇
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹