容祖兒的《ANOTHER SIDE…JOEY•MY SECRET•LIVE》演唱會昨晚（15日）來到第三晚，亦是第一日開放予公眾售票的頭場，祖兒愈唱愈勇，狀態極佳，現場觀眾驚嘆舞台漂亮機關連連，醉倒於她的唱功之中，現場充講笑聲、掌聲、歡呼聲，還有求婚聲，歡樂無盡！她又坦言這幾天已被歌迷炸爆社交媒體的INBOX，不停要點歌，非常瘋狂。
祖兒講到求愛男的小故事後，現場就開始充滿求婚聲，「嫁俾我！」、「我娶你！」、「 I MISS YOU BABY」，氣氛歡樂又熱烈。來到點歌時間，祖兒對觀眾說：「今日見到大家好開心，我覺得今晚每次唱完歌嘅掌聲，係最多最豐富‥‥‥我完全感受到大家每首歌都聽到入咗心‥‥‥俾到我好多力量，唔單止掌聲，仲有瘋癲呼叫聲、瘋狂求婚‥‥‥哈哈哈。」
祖兒坦言在過去四年裏自己成長了不少，「今次重臨舊地，四年再可以係香港同大家去開演唱會，過去三年我相信每個人都經歷咗好多，係全世界全宇宙最難捱時間，我呢個典型裙腳女，冇得返屋企真係好難捱，平時我係出面點辛苦點難，幾多挑戰，我返到屋企就可以充電，但係前幾年要一個人喺出面獨立生活，工作家務都要一個人處理，唔洗衫冇衫着，洗完唔摺張凳就冇位坐，唔吸塵腳就會黑晒‥‥‥我為咗有家嘅感覺，連屋企用開隻洗衣液都買一樣，等我洗完衫覺得似喺屋企，朋友問我：『你唔睇電視你開住個電視做咩？你傻㗎一早起身吸塵。』然後我先知，係喎，我唔睇電視但係我媽睇，喺香港每朝阿媽吸塵機聲都係我鬧鐘‥‥‥冇得返屋企嘅我，就係靠呢啲味道、聲音支撐住。今日終於可以重新見到大家，做自己最鍾意嘅事，真係好開心！當日我一個人聽住以下呢首歌跑步，自己歌都打動到自己，落咗兩滴眼淚，以往一直未有時間同大家分享過呢首歌的感受，今日終於都可以，所以請容許我今日唱唯一一首唔係side track嘅冠軍歌——《東京人壽》。人生路上，堅持下去，咬實牙關，所有事都會過，多謝大家咁鍾意呢首歌，冇上電台冇宣傳，舊年一派出嚟就冠軍歌。」
此外，祖兒不忘恩師羅文的提攜，將《Just for you》重新編曲，當是給老師的禮物，她說：「音樂對我來說非常重要，陪伴我度過好多脆弱時間，細細個好鍾意王菲、leon，大家都知，好多流行歌曲俾咗我養份，多謝喺我人生中出現過的音樂上好伙伴，希望日後我可以繼續為大家提供好多好多好歌，陪伴你地所有最好時光。」
