無綫劇集《回歸光影頌》於明晚（8日）播出最後一個單元《曙光》。該單元由何廣沛、陳曉華主演，更有羅樂林特別演出。
該劇悲中有喜、黑暗中有曙光，帶出堅持信念和正面信息。劇中為了增添男女主角間的浪漫氛圍，更用了林子祥的經典名曲《分分鐘需要你》。之前憑《異搜店》成功入屋的「廣華」CP，何廣沛和陳曉華今次會演夫妻，甜蜜溫馨場面及吵架場口，可說是駕輕就熟。
對於與曉華再次合作，廣沛直認默契十足，並指她私底下是大頭蝦，自己需要像哥哥般照顧對方：「佢好多甩漏、會整污糟戲服、帶漏嘢，又或者失驚無神唔見嘢要幫佢搵，會好勞氣同激心，但又唔忍心嬲佢。」曉華則透露與廣沛會互相鼓勵：「雖然我哋平時都嘻嘻哈哈，但係無論係談情嘅戲定係嗌交戲，我哋都唔同平時嘅我哋，唔會忍唔住笑。有陣時對方NG嘅時候，我哋都會好自然畀對方一個鼓勵嘅眼神，好有並肩作戰嘅感覺。」
