現年35歲的馬賽，19年與圈外男友結婚，同年誕下囡囡Camellia，婚後淡出幕前，專心相夫教女。囡囡剛踏入四歲生日，馬賽宣布告別全職媽媽生活，全面復工。
馬賽的銀色旅途可以說是經歷高山低谷，08年參選港姐，備受力捧擔正女主角；11年奪得「飛躍進步女藝人」，獎項至今仍擺放在北京家中，「個獎剛好十二年了，選港姐和拍劇那幾年對我很重要，如果有機會，我好樂意返去報恩。」
為了復工，馬賽拍攝一輯靚相，她傳來幾張與囡囡的合照，狀態不錯，似乎已回復最佳狀態準備復工，馬賽說：「肥了六磅呀！上鏡就好覺，剛剛入劇組，這幾天食少咗，每日喺間房做運動，始終新陳代謝慢咗。」
馬賽正身處南昌拍劇，今次是跟家人分開最長時間的一次，「其實點解話告別全職媽媽，是因為生了女兒之後，未試過離開個囡咁耐，今次要逗留一個月以上，不過，估唔到覺得幾輕鬆，原來拍戲容易過湊女好多，哈哈！昨日開工開咗15個鐘，可能以前TVB都慣晒，拍戲只需要顧及角色和對白，反而屋企要顧住個女、顧住屋企人衣食住行，我今次當係放一個月大假。」
由16年返內地發展，馬賽在兩年間參與的劇集和電影，數數埋埋有十九套，她說：「當時都發展得幾順，慢慢站穩陣腳，之後生女，跟住就爆疫情，足足停工四年。」今次全面復出，她第一時間徵求女兒的同意，「可能我都帶過她開工拍戲，她知道什麼是拍戲，慢慢有個concept，我同佢講，媽咪都想有自己嘅人生價值，如果唔係，媽咪就好似一個普通嘅housewife，我又問佢，媽咪出去做嘢，你接唔接受呀？定係想我喺屋企陪你？佢好鼓勵我，叫媽咪要發光發亮。」
馬賽大讚囡囡性格：「外向、好獨立，好講道理，仲好幽默，我覺得同我一路照顧佢有關係，其實做咗媽咪之後，的確放棄了很多工作機會，亦都因為疫情，不過有時兩面睇，亦因為停工這三年，可以陪住佢一起成長。」
問馬賽會否追多個？她二話不說表示「封肚」，決定不會再追，「我好執着，如果有小朋友，頭幾年我一定要貼身照顧，分唔到身，現在囡囡叫做大了，我覺得自己的人生仲有好多夢想想去完成，我驚自己唔夠時間，現在心態是想再衝一下事業。」問到復出老公是否贊成？她說：「佢都支持，其實佢最驚我辛苦，第二係怕我可能會有挫折，這個年紀要重新開始，加上脫離這個行業一段時間，所以佢安慰我，叫我當興趣做好了，反而係自己仲有少少鬥心，我覺得唔應該就咁放棄，現代女性應該有自己家庭之餘，亦要有自己事業，要在社會上有價值，我自己都係學習中，點樣可以在家庭和事業找到一個平衡。」
最令馬賽決心復出，是去年婆婆的離世，「婆婆一直很支持我演戲，所以我更加覺得要不負今生，加上爸爸媽媽年紀都大了，我覺得要回饋他們，多年來他們見住我起起落落，我知道他們是希望個女在事業上有些成績的。」
離家開工一個月，屋企的重任就暫時交給老公，「媽媽和奶奶都有幫手，她們住得好近，可以讓他們隔代親，有時老人家幫手照顧小朋友，其實他們也覺得是天倫之樂，我長期係屋企，反而個女最黐我，我都要學識去放手。」
馬賽21年曾改名馬菀迎，對此她解釋：「其實我冇正式改名，當時只是叫做夾個八字，馬上就有新聞話我要改名轉運，其實冇，我都係叫馬賽。」馬賽話這幾年在內地工作，不時會撞到以前的朋友，「之前拍戲撞返拍《葉問前傳》的燈光師，很多熟悉的面孔。」至於無綫的藝員，馬賽與王浩信和胡杏兒仍有保持聯絡，「我和浩信08年已經認識，最近他也到內地發展，我們在北京都有聚下。杏兒好好，前幾年參加春晚，因為她要隔離，找我去幫手在綵排stand in她的位置，這些都是機會。」
馬賽說無綫出來的人都很有人情味，「我哋有個WhatsApp群組叫『名媛望族』，松哥(劉松仁)、Mary姐(韓瑪莉)、江美儀、朱晨麗、楊怡(楊茜堯)、馬國明等等，松哥當時要大家每日都要講早晨，十幾年喇！到今時今日，大家每朝都會講句good morning，有時互相問候，可能大家叫做一齊捱過，感情keep得好好。」馬賽11年曾奪「飛躍進步女藝人」，這個獎是她選港姐之後，入行的第一個獎，當年她去內地發展，亦把它帶在身邊，「個獎仲keep住，當日去北京都帶住，嘩，個獎剛好12年了，選港姐和拍劇那幾年對我很重要，好多人問我會唔會返TVB拍劇？未來如果有機會，我是好樂意返去報恩。」
