Advertisement

吳保錡永不放棄「人生靠努力」 跑步瘦身 曬黑催運│保錡專訪

本地
2023.05.26
撰文:文嘉龍攝影:鍾漢平

 

 

whatsapp-image-2023-05-24-at-5-53-18-pm-19 whatsapp-image-2023-05-24-at-5-53-18-pm-22 whatsapp-image-2023-05-24-at-5-53-18-pm-23ERROR成員吳保錡由年初參加渣馬後,從此愛上跑步,沉迷上癮程度是幾忙都要每日一跑,訪問當日他說:「完咗訪問,夜啲我都去跑!尋晚凌晨做完晒嘢都有跑!」他不是講玩的,身體力行跑之餘,還開了一個專屬「跑步」的IG,連新歌都由跑步而啟發。

跑步如人生,保錡說:「自律!總之一定要學識自律,一點一滴累積所有嘢!」由做茄喱啡等運到、之後《造星》組團發圍、再到三角戀風波衰過又起返,一步一腳印,保錡發現以往原來「輸咗俾自己」,「俾咗好多藉口自己,依家可以話俾人聽,其實人生靠努力。唔好要求人哋俾到咩你,要求自己俾咗咩自己先!」難得認真不搞笑的保錡說。

whatsapp-image-2023-05-24-at-5-53-18-pm-1 whatsapp-image-2023-05-24-at-5-53-18-pm-28 whatsapp-image-2023-05-24-at-5-53-18-pm-2保錡瘦了很多。宣傳大員在現場拍照時也對他說:「影到你塊面好尖!」保錡說:「我依家有腹肌添啦!」瘦了又黑了,一身古銅色靠每星期曬燈,命理師傅說他愈黑愈旺,不過保錡說,公司命令他不可再「黑」下去,曬燈適可而止。保錡今年的確夠旺,早前在《Chill Club》頒獎禮奪得男新人銀獎,總括今年頒獎禮成績,交足貨有餘,「點解會咁開心?因為我細細個已經好鍾意彈琴、吹小號,又加入管弦樂團,玩音樂真係一個夢想。ViuTV頒獎禮真係投票,冇人鍾意你咪冇獎囉,我攞到銀獎,證明原來香港都有一撮人支持我,我冇白費心機去做每一個作品,感動係攞到個獎有人肯定!」

有人肯定,不過保錡卻自嘲是「半紅不黑」藝人,「你又唔係劉德華、郭富城咁叻仔,又唔係張家輝,佢哋呢啲真係好勁,演技超勁跳舞超勁。我自己係學習階段,我只想睇下有冇一日,我會成為某個項目特別勁嘅一個artist,所以依家發掘緊自己,邊一樣嘢係最叻!」要數近期最叻,非跑步莫屬。講起跑步就精神的保錡說:「跑步就係你唔會無啦啦一步登天,變咗保特(短跑飛人)咁勁,真係要每日不停訓練,要提醒自己飲食各方面。當你每日去跑步,你會犧牲去玩樂應酬,每日會跟住個課題去跑。最大改變係我依家,每日起身都好精神,你會感覺到,尤其是娛樂圈,好多人都係講多過做,好多social嘅人,你會盡量減少啲同人social,因為你知道自己時間唔夠用。我依家三十幾歲,加埋做運動、返工、練跑,基本上已經冇時間,邊樣嘢最重要,我覺得事業係我最重要嘅嘢;第二件事就係,我想成為一個用生命感染生命嘅人,我不停去練習,證明俾人睇,原來我努力可以改變到自己,我想做呢件事。」

唔係每個人都係聖人

努力之餘,堅持不放棄亦是保錡的重要課題。新歌《Echo My Heart》就藉跑步領悟而創作,「資質不夠小說話(歌詞),依家有好多人跑,有啲唔想練習嘅人,佢哋都會有好多藉口,今日病呀、唔舒服呀、今日隻腳攰呀,原來問題就係輸咗俾自己。我覺得呢首歌可以話俾人聽,其實人生係靠努力,靠自己一步一步,唔好要求人哋俾到咩你,要求自己俾咗咩自己先,呢個係最緊要囉!」

whatsapp-image-2023-05-24-at-5-53-18-pm-8 whatsapp-image-2023-05-24-at-5-53-18-pm-26 whatsapp-image-2023-05-24-at-5-53-18-pm-6低潮與放棄,保錡都經歷過,「人生最低潮或者不了解呢個世界嘅時候,係一個學習階段,唔係每一個人都係聖人,你冇做錯過任何嘢,你唔會知道自己應該點做,所以其實我都感恩,我擁抱晒我所有嘅經歷。」21年公開與沙律(張沛樂)認愛卻惹來劈腿風波,保錡曾陷入低谷,他說:「唔好話翻唔翻到身先,反而我更加清楚自己喺社會度,應該要做一個咩人,因為一開始我係《全民造星》出嚟,冇人話俾你聽其實你有咩做,我都唔知道自己有人識添,啲人覺得我搞下笑,或者當我小丑,嗰時好迷失,唔知自己應該要做啲咩,依家我就好清楚自己想成為一個咩人!」

由始至終,最想成為一個歌手,保錡真心鍾意唱歌,他說雖然很多人都認定他只是個「搞笑綜藝咖」,「以前啱啱出道食下魚眼食下辣,叫你跳下Bungy Jump跟住又喊,全部人睇你都覺得你食辣同埋食魚眼囉!佢唔會理解你個夢想係咩本質,我唔知自己搞笑係為咩!我拍戲係想做張家輝,做張家輝前期嗰啲搞笑片,因為我好鍾意氹人開心,人哋開心我都有成就感。音樂方面我真係好想喺台上面唱歌表演,我細個鍾意古巨基、吳浩康呢啲歌手,我成日諗有冇機會入到英皇,所以我參加過兩次英皇新秀比賽,都冇入過圍失敗咗,初賽已經俾人叮走!你知唔知《全民造星》,係我人生第一次入圍嘅音樂比賽。」

一世都唔好再諗入行

whatsapp-image-2023-05-24-at-5-53-18-pm-9 whatsapp-image-2023-05-24-at-5-53-18-pm-30 whatsapp-image-2023-05-24-at-5-53-18-pm-24參加《造星》前的保錡,更是一個做足7年茄喱啡等運到的人,「19歲開始做茄喱啡,做到26歲入行。做茄喱啡群眾演員,跟住參加啲藝員訓練班,跟住英皇新秀,不停參加比賽。打好多份工,因為你做茄喱啡特約演員,唔係日日有工開,所以打過好多份工,做過賣電話卡叫人join plan、會展搭嘢都有做過。如果做過炒散就知,炒散其實有一個group,每日都會send啲工過嚟,唔使特別識做,派報紙嗰啲我全部都做過,喺大埔工業邨嗰度,跟住整月餅、包粽全部都做過,因為人工高嘛!」

一個《造星》節目,改變保錡人生。最近新一屆《造星》又開播,保錡說除了自己有份參加的第一屆,其他每屆都沒有時間收睇,「絕對冇睇!因為我已經係一個綜藝咖,呢幾年主要做綜藝節目多,冇乜時間睇電視!我感恩自己有參加過,大膽一嘢衝過去就參加,冇諗過自己之後可以咁樣,從來唔知未來會發生咩事!我唔做茄喱啡,我同自己講過,我26歲嗰年參加比賽,如果我再入唔到行,我直接唔做,唔好喺度磨,因為26歲入行,已經係好差唔多㗎喇,入唔到就唔好入,我拚咗最後個生命去。我同自己講過,如果呢個比賽入唔到行,就一世都唔好再想入呢行!」

追夢成功,但距離夢想有幾遠?32歲保錡說:「到咗㗎喇!跟住全部都係感恩,每日都係恩賜,上天俾我嘅,本身見到張家輝(終極偶像), 我淨係可以喺電視或者電影院見到張家輝,但係我依家可以見到真人喎,你又會無啦啦喺電視度見到自己個樣喎,電影無啦啦又會有吳保錡呢個人,全部都已經多咗!我已經好感恩!」

目前最想專注跑步與唱歌,拍拖暫時放一邊,「因為冇晒時間,練跑加拍嘢加造歌,邊有時間諗咁多嘢!我唔想拍拖呀,練咗跑之後,有時睇鹹片都冇時間,以前都鍾意睇鹹片,個個男人都鍾意,不過依家練咗跑,其實你都攰到費事睇!」保錡補充,文雅一點的說法,是「日本藝術動作片」才對。

化妝:Cori Wong @Annie G. Chan Makeup Center
髮型:Harris Lai @CHIC Private I salon
Man Chan @CHIC Private I salon
服裝:432hz
場地提供:十八夢(銅鑼灣)

MIRROR 聲夢傳奇 姜濤
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹