Advertisement

劉松仁再執導音樂劇宣布「收山」 瀟灑面對生死:病都要精采!

本地
2024.02.14
撰文:孜卓芹

劉松仁健康地亮相宣傳音樂劇。
劉松仁健康地亮相宣傳音樂劇。

【今日睇咗未?】薛家燕好姊妹相聚獨欠馮寶寶 借七公主結拜60周年賀情人節|劉松仁再執導音樂劇宣布「收山」 瀟灑面對生死:病都要精采!(14/02/2024)

74歲劉松仁(松哥)自20年被驚傳中風後淡出幕前,只在微博帖文跟網民互動,不過日前他為其執導及創作的音樂劇《利瑪竇》宣布再度公演,是爆出傳聞後首度亮相受訪。

松哥與主演的王梓軒,接受無綫娛樂新聞台主播王鎮泉《StarTalk》訪問時透露,原本無意製作音樂劇,但因與主導《利瑪竇》的恩神父深交多年、才幫忙完成對方心願,神推鬼擁下更成為導演。談到音樂劇找來杜琪峯共同策劃,松哥感激對方無限量支持,其實二人自96年合作電影《十萬火急》後沒再合作,松哥親揭箇中真相:「佢(杜琪峯)話:『松仔,知唔知點解唔搵你拍戲,因為唔想冇咗個朋友!』如果我哋兩個合作,可能真係嗌交。」

劉松仁與王梓軒接受娛樂新聞台主播王鎮泉《StarTalk》訪問。
劉松仁與王梓軒接受娛樂新聞台主播王鎮泉《StarTalk》訪問。

松哥為專心籌備音樂劇,已有一段日子沒有亮相幕前,松哥坦言當上導演後已沒有演戲慾望,並揚言「收山」不再拍劇兼拍戲。談到近年傳出中風身體狀況欠佳,松哥坦然面對生老病死,並指無論任何階段都應要活得精采:「病都要精采,死都要瀟灑,我希望人哋講我病咗係點樣面對,呢樣先係最緊要。」

松哥在另一個訪問中則謂,非常享受該劇創作與排練過程,但卻從未想過參演其中:「我淨係想做觀眾,我唔鍾意演戲㗎,講出嚟都好笑,我唔係享受演戲嗰啲人嚟。(但係你演咗40年喎?)係呀,唔通唔使食咩?哈哈哈。」梓軒此時突然爆小秘密,指有機會以演唱會形式呈現,屆時有「利老竇」(利瑪竇爸爸)的角色,至於角色誰屬?請大家自行猜想。

王梓軒爆料。
王梓軒爆料。

對於早前傳出身體欠佳,松哥大笑回應:「我嘅狀況點,讓你話俾佢哋聽。」梓軒指松哥的精神力量非常強大:「佢一入間房係好似空氣靜止咗咁,然後嗰條虛構嘅紅地毯就出嚟。」松哥聞言表示,從電視台年代學習到何謂「壓場」,又指自己過去太嚴肅:「後生嗰陣我好嚴肅,因為好集中諗緊點演點演,直到有次我同陳玉蓮拍嘢,佢啱啱相反。佢一入廠『點呀你哋?』好開心嘅,我嗰時學到嘢。於是,我以後返屋企見到阿媽就要笑,嘩,好有力量,我係假(笑)㗎,啲肌肉硬㗎,我唔理,我依(依起棚牙),依到我真係有個笑容出嚟,母子關係產生幾大變化。以後同人傾偈,傾咩都俾個笑容先,遲兩秒講都得㗎,呢樣好嘢,唔好睇小笑容。」

松哥對演藝事業如此投入與熱愛,是否永不言休?他說:「唔理咩圈,我後生都講,無論我掃街又好、演戲又好,做咩都好,都係服侍我學習做人,所以喺邊個環境都冇所謂。」

姜濤 聲夢傳奇 陳卓賢
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹