Advertisement

劉威煌曾眼紅許廷鏗 最介意被網民冠上呢個稱號

本地
2024.06.01

%e5%8a%89%e5%a8%81%e7%85%8c

劉威煌最近接受雷霆881商業一台《星光背後》專訪,分享15年來由「威煌隊長」廣為人識,到飽受網絡欺侮被封為「常威」或「億萬駙馬」,事業跌入谷底的心路歷程。談及再參賽及再出歌的野心,他直言:「再想紅呢啲已經係好傻,真係好純粹想有一個舞台。」

劉威煌接受梁泰來主持的《星光背後》訪問
劉威煌接受梁泰來主持的《星光背後》訪問

2009年參加第一屆《超級巨聲》而入行的劉威煌,2017年一度因生計放棄歌手夢,去年年底他重燃唱歌夢,相隔15年再戰歌唱真人騷《中年好聲音2》,雖然最後八強止步,但他繼續為唱歌夢而奮鬥,事隔多年自資找來「夢幻班底」,由澤日生作曲、林夕填詞,與及梁榮駿監製,推出新歌《普通人》。

snapinsta-app_434259072_3538997733078688_8610414300700154764_n_1080

劉威煌在出道前,就如其新歌《普通人》一樣,曾經當了10年打工仔,月入達二至三萬,後來放棄穩定入息簽約TVB放手一搏,他說:「本身做咗十年印刷sales,返五日工,禮拜六、日參加一啲小型唱歌比賽,慢慢都有啲fans,偶然之下有fans自己幫我報咗《巨聲》。入行之後其實冇乜計劃,當時機會比較多,《巨聲》有演唱會,有得出歌,又有annual dinner,覺得收入同之前份工差唔多,金額算滿意,可以話有發過明星夢。」及至劉威煌於2015年提早解約,只演過兩齣劇及唱過兩首劇集主題曲,他承認當年曾羨慕戰友許廷鏗,「當時我係有眼紅有羨慕,點解人哋咁犀利?但自己亦有責任,因為我係門外漢,公司話點就點,直情響屋企等運到,但當時工作好密,無想過後續。」

劉威煌曾眼紅同一屆《超級巨聲》的許廷鏗
劉威煌曾眼紅同一屆《超級巨聲》的許廷鏗

除了受到之後的《巨聲》二、三幫後浪推前浪所影響,劉威煌在2010年發表「實力股」言論,被指暗寸羅力威飽受網民圍攻,令事業大受影響,其後更被網民冠以周星馳電影反派角色「常威」作花名,令他飽受困擾。談及當年失言,他說:「實力股事件係最先遇到嘅打擊,係公關災難,識我嘅人就會知我無惡意,我同羅力威後尾都係friend嚟㗎。我無諗過撐A變了攻擊B,證明自己當時好幼嫩。」至於被指貌似「常威」鄒兆龍,近年他才釋懷,「嗰陣對我係幾大打擊。俾人叫『常威』好嬲㗎,因為係反派角色,代入咗『衰人』兩個字,好想為自己平反!後來先知好正喎,個個都記得我,同古淖文比賽都直接叫我『常威』,哈!以前反駁係好傻,嗰陣我真係唔識網絡嘅運作。」

whatsapp-image-2023-12-26-at-18-10-09-1

不過,對於另一網民封號「億萬駙馬」,劉威煌直到今天仍介意,亦沒想過2014年公開與交往7年的太太Sandy結婚後,太太會被人起底,「到而家都介意『億萬駙馬』呢個名,叫我『常威』仲好,因為唔係事實呀嘛,介意係因為老婆背景唔係網上所說咁勁,係好困擾我哋兩個,因為事件涉及很多人,包括老婆同我的兩個家庭,如果我食軟飯,亦唔使工作。」

劉威煌感激太太18年來全心全意待他
劉威煌感激太太18年來全心全意待他

他感謝太太由拍拖到結婚至今18年,一直全心全意待他,包容他硬頸性格,當年《巨聲》時代,太太反對他辭工入行,原來去年再戰《中年好聲音2》,太太也一度反對,「佢第一時間反對,驚大家都再受打擊,首先有好多舊事俾人重提,其次大家還會不會接受我?參加目的又係乜?我話俾佢知我只係鍾意唱歌啫,身邊好多朋友支持我再試,我叫佢唔使擔心,我唔係想去再紅再做返歌手,隨心去做努力做,唔好諗會帶俾你啲乜。」劉威煌指林夕為他寫《普通人》的歌詞,正正代表他的心聲。

MIRROR 聲夢傳奇 星級企業大獎2020
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹