Advertisement

出道15年 追尋發光舞台 Gin Lee進化論「獨一無二經歷」|封面故事

本地
2024.04.05
撰文:文嘉龍攝影:Karl Lam

whatsapp-image-2024-04-03-at-4-12-35-pm-4 whatsapp-image-2024-04-03-at-4-12-35-pm-6算一算,09年於大馬出道的Gin Lee李幸倪,今年是十五周年了。

這位來自馬來西亞的女子,10年隻身來港追夢,那時候她在網誌寫下,「我就是那位在《超級巨聲2》踢館的李幸倪,我知道今天晚上香港就會播出我踢館的片段……我要說聲謝謝,我就是那位唱《新不了情》的Jeanie李幸倪」,一踢成名,當年的Gin Lee仍叫Jeanie。

Gin Lee出道15年 追尋發光舞台進化蛻變|生於音樂世家 鼓手爸爸被星探揀中拍電影|隻身來港追夢 融入港式生活|Gin Lee專訪|封面故事

人在異鄉奮鬥多年,這天訪問中,Gin Lee最常強調的是,每個人都是獨一無二,「所有好與唔好,我失敗與成功,都係我獨一無二經歷,成就今日的我,一路進化嘅李幸倪,蛻變成一個,我希望成為更好嘅自己!」

Gin Lee隻身來港奮鬥15年 「追夢需要衝動!」|Gin Lee專訪|封面故事

人生有幾多個十年?Gin Lee說:「每十年都會回望自己呢十年嘅成長,我覺得呢一個path,我做嘅音樂,都係獨一無二!」

有少少被Gin Lee當頭棒喝的一句是,她說:「我發現好多人,都係做緊一啲自己唔鍾意做嘅嘢!」而她,從一而終走唱歌的路,「最緊要你搵到自己價值,自己發光,搵到自己嘅舞台喺邊度!」找到對的舞台,很重要,Gin Lee找到了。

短跑長途賽馬拉松

whatsapp-image-2024-04-03-at-3-29-15-pmGin Lee說,新歌《Diff.》的主題是探討「自我價值」這個信息,「我覺得每一個人來到呢個世界,都係獨一無二,有自己角色、有自己使命、有自己character、有自己style,每一個人都係與眾不同;但係我哋好多時候,會因為呢個社會、學校、公司、家庭,俾我哋一啲定義去困住咗,譬如呢個環境會話俾你知,咁樣係靚、咁樣係成功、咁樣係最好,但係呢一啲定義,係咪一定啱自己呢?我覺得好多嘢,冇話絕對啱或者絕對錯,最緊要你搵到自己價值、自己發光、自己舞台喺邊度,你就可以開心做一個獨一無二嘅自己。」

訪問的時候,《熱辣滾燙》仍未在港上映,但Gin Lee與賈玲對人生的看法,無獨有偶地如出一轍,都是擁抱「YOLO」哲學,「因為你一生you only live once(YOLO),你得一次機會,但係可能用咗好多年時間,去做一啲自己唔鍾意做嘅嘢,因為某啲原因、環境,話俾你知咁樣就係好,所以你就要行呢條路,或者你爸爸媽媽話俾你知,咁樣就係佢心目中有出息,但我覺得唔一定!」

Gin Lee是幸運的。她出生音樂世家,爸爸是樂團團長兼鼓手、母親是大馬的知名秀場女歌手,自小父母沒有迫她行另一條大眾眼中出息的路,而她一直做着自己喜歡的事情,更有一把會唱歌的聲音,Gin Lee坦言:「我的確非常幸運,因為我依家行緊嘅路,十幾廿年都係行緊音樂方向,我覺得個天俾我一個talent,我可以用呢一個天賦,去share我嘅音樂、share我嘅力量、share我嘅message俾更多人,所以係好幸運;但亦都會有好多挑戰,因為當你將你鍾意做嘅嘢,變成你嘅事業,會遇到好多困難。」

將興趣變成事業,如何保持那份熱情?「我覺得有時停一停,休息吓好重要,如果你冇一個停頓位,就會好麻木同好盲目,所以我真係好幸運,因為我每一日都做緊我自己鍾意嘅嘢,我唔使返一份我會覺得好苦悶嘅工作。如果你真係夠愛一樣嘢,無論你經歷幾多次掙扎,你最終都會揀返佢!我一定會有啲moment係好攰呀,我只係想開心心唱歌啫,變成事業要諗好多嘢,又要做好多其他音樂以外嘅嘢,但係反反覆覆,你真係夠鍾意嗰樣嘢,最終揀來揀去,你都會揀返同一樣嘢,唔使再掙扎,就係佢,肯定就是你!哈哈!」

「肯定就是你」不止是一句洗腦歌詞那麼簡單,簡直是Gin Lee的人生選擇,她肯定的選了音樂這條路。Gin Lee在中學時代是名短跑健將,運動員講求堅持,她將以往的訓練應用在歌手的生涯,運動員與歌手,不一樣,又一樣,「我覺得對我依家最有幫助,係運動員嘅訓練,因為運動員訓練好苦悶、好辛苦,我由細細個已學識一樣嘢,就係台上一分鐘、台下十年功,我好細個已經明白呢個道理。每一日同同學一齊返學,但係我每一日都係遲過佢哋放學,上完課留喺學校去訓練,練到天黑先返屋企,跟住先做功課、瞓覺;去到放暑假,我每一日都要返學校繼續訓練,每個同學去咗邊度玩好開心,我就每一日風雨不改返學校繼續訓練,加上我係短跑,短跑得嗰十幾秒,就係為咗嗰十幾秒賽事,三百六十五日訓練,所以我好細個已經好明白,你要為咗嗰一個比賽、嗰個舞台,你就要付出好多精神時間、好多堅持,你先可以上到嗰個戰場,呢一個訓練同心態,其實幫到我依家,同我依家好相似。你上台三分鐘一首歌,如果你唱得好,人哋就會認同你,如果你嗰三分鐘screw up(失敗),冇㗎喇,或者會有好多手尾,留下呢個黑歷史,好大影響!」

短跑贏輸取決那十多秒的賽事,身處娛樂圈,卻是一場長途賽,Gin Lee說,其實更像一場馬拉松,「以前細個短跑,我係講爆發力,儲足所有能量跟住衝,十幾秒定勝負;依家呢,有時好似長跑、有時又好似馬拉松,譬如你做騷,就係一啲爆發力,你要好高度集中去做好performance,但係成個事業來講,其實係一個馬拉松,要不停keep住好有毅力,有好多耐心,做得唔好唔緊要,下一次再嚟過。」

攝影助理:John Yan
花絮攝影:伍敏慧
造型:Amissa Tsui
造型助理:Janice
髮型:Heibie Mok
化妝:Chi Chi
服裝:Ralph Lauren、Dolce Gabbana、SPORTMAX、Ferragamo
首飾:HEART ON FIRE、MESSIKA

MIRROR 陳卓賢 姜濤
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹