相隔六年，容祖兒再於演藝學院開Side Track騷，共34場《ANOTHER SIDE…JOEY•MY SECRET•LIVE》昨晚(13日)開鑼，祖兒早前呼籲大家要穿上「secret life dress code」到場，不少歌迷都花盡心思，又扮雞、又扮外星人、又扮王子；首場蔡卓妍、Gin Lee和林海峰都有捧場。四年未在港開騷，祖兒一出場就搞笑，「熟口熟面，又係呢個地方，又係呢啲人，大家覺得我有冇變呀？」歌迷大叫：「變靚咗！」穿上短裙的祖兒行近觀眾席，不小心露出「打底褲」，「哎吔！去到邊都睇到，前面個啲人係咪開始流晒鼻血？唔緊要啦，反正大家一家人，『打底褲』就係用嚟打底，預咗俾大家見到，呢啲先係secret live！哈哈。」
祖兒今次精選26首歌曲，有些更是首次在台上獻唱，包括《溶》、《渴望晨曦的女孩》、《一個人砌圖》、《我杯茶》、《候鳥樹》、《敬請留步》、《我好得閒》、《13點》等等。
祖兒亦有談及內心世界，她坦言自己是一位歌手外，就係一個中女，她說：「有事業，生活無憂，但仲係一個人吊吊揈。」祖兒反問觀眾擔不擔心她？她大爆最緊張「容祖兒」感情生活的人，是她姊妹蔡卓妍，祖兒說：「我同蔡卓妍感情唔使介紹啦！今晚佢都有嚟，有段時間，佢真係好瘋狂，佢應該係全世界最希望我得到幸福嘅人，佢見到所有男人，都會落個啱唔啱容祖兒嘅filter，佢同我講，『你咁可愛又咁搞笑，我係男人都溝你啦！』對於阿Sa嗰份真心、認真、熱誠，我唔想辜負佢，所以有一次佢介紹咗一位異性俾我識，咁我哋就禮貌上交換個電話，之後各有各忙，我同對方，只係斷斷續續text一段日子，都係講啲『加油』、『how are you？』之類啦，我個人好慢熱，都係為咗阿Sa一番心意。」
祖兒續說：「對方呢，見我回多一兩次，就開始send自拍照俾我，又報告生活狀況，我當時都驚一驚，但為咗尊重阿Sa，都留咗個emoji咁，點知佢竟然傳句『I miss you baby！』嗰一刻我真係嚇死，baby後面仲有句『不如我哋試下發展！』吓！你又唔了解我，對方不知何來的自信，竟然話『我已經睇晒你啲演唱會！好了解你係咩人。』各位觀眾！睇晒我演唱會DVD想同我拍拖？咁你哋由細睇到我大，我咪要同晒你哋一齊？哈哈！」全場觀眾笑爆。完騷後，祖兒話：「收到好多朋友恭喜我個騷咁成功，個個都大讚好睇，但個個最後都加句『I miss you baby』笑死！」
《ANOTHER SIDE…JOEY•MY SECRET•LIVE》歌單
1.《溶》
2.《渴望晨曦的女孩》
3.《一個人砌圖》
4.《我杯茶》
5.《候鳥樹》
6.《28個我》
7.《敬請留步》
8.《我好得閒》
9.《13點》
10.《Honey》
11.《小日子》
12.《煙花紀》
13.《戀人未滿》
14.《圓謊》
15.《無人知道雙子座》
16.《玩家》
17.《蜃樓》
18.《飛》
19.《夢非夢》
20.《男朋友與歌》
21.《東京人壽》
22.《陪我長大》
23.《舊日回憶的山丘》
24.《螢》
25.《ANOTHER SIDE MEDLEY》
26.《最好時光》