Advertisement

內地官司未完結不敢再簽公司 細貓首談桃色風波│應智越專訪

亞洲
2024.02.02
撰文:劉家倫攝影:洪志富

應智越(細貓)是《全民造星》第一季的10強,參加過《偶像練習生》,亦是韓國練習生。曾半隻腳踏入MIRROR,卻因各種原因變成獨立歌手,出道三年,星途尚算順利,前年舉行處男個唱,又與鄭裕玲(Do姐)拍旅遊節目。

直至去年,細貓的前女友在社交平台發長文炮轟,細貓迎來事業第一個打擊,選擇低調處理的他,坦言最生氣的是母親;在單親家庭長大,細貓自小知道要生性搵錢養家,就連做歌手,都是因為母親的一個遺憾。

參加《全民造星》後,細貓被指是第一批被花姐睇中加入MIRROR的參賽者。
參加《全民造星》後,細貓被指是第一批被花姐睇中加入MIRROR的參賽者。

雖然入行短短三年,但細貓十一年前已選擇到韓國讀書,繼而當上練習生,「因為我係第一屆DSE,跟末代A-Level考生爭大學,當時的學位根本就唔夠兩年的學生,2013年便去韓國,本身去到是先讀韓文,直到2014年在韓國慶熙大學讀音樂,才有機會去training。」

細貓坦言當時並不是因為K-Pop文化而去韓國,他解釋:「對音樂是有興趣,喜歡創作,但在香港本身修讀的科目與阿哥一樣,由小到大,在家裏什麼都跟阿哥比較,我小時候好肥,成日黐住阿哥,阿哥帶我出去會覺得有個肥細佬阻住晒,以前阿媽成日都叫阿哥帶我去踢波,咁又細個又肥,其實去到邊隊都會拖累,係啦,總之就唔想同阿哥讀同一樣嘅嘢。」

 

做練習生時,細貓由早練到晚,最後被內地公司揀中出道,可是卻失望而回。
做練習生時,細貓由早練到晚,最後被內地公司揀中出道,可是卻失望而回。

細貓所讀的大學出產過不少知名韓星,包括孔劉、Rain、G-Dragon等,「我記得嗰陣最hit係《Gangnam Style》,所有學生,其實個個都目標清晰,好清楚自己做緊乜,我的確有些被潛移默化,一落堂,有人問香港學生聚會食飯,但我係選擇練習,仲係要偷用音樂學院的音樂室、練琴室去練琴練舞,都習慣囉,大家朝早九點上堂,canteen食完lunch,跟住練琴練到五、六點,又係去canteen食晚飯,你可能會覺得都練到夠皮啦?夜晚去邊度行下?唔係囉,都係繼續練琴,練到十二點。」細貓能夠堅持,全因為母親的一個遺憾,「大家成日都講,俾心機讀書就搵到錢,其實係咪真㗎?唔係個個家庭都會俾子女去讀音樂變成職業,我話去的時候,阿媽先講原來音樂係佢夢想,因為細個根本冇呢啲機會,好想個仔繼承夢想,知道阿媽有咁嘅夢想,咁就係咁衝!」

單親家庭長大,細貓習慣報喜不報憂。
單親家庭長大,細貓習慣報喜不報憂。

進行偶像訓練期間,有內地公司到韓國揀蟀,細貓曾經與朱勻一、朱勻天、萬宇賢、趙俞澈組成偶像男團Catchers出道,發行一首單曲《Dangerous》,但這次變成了他日後不敢與人合作的原因,「當時都是無知,跟內地公司簽約咁就出道,之後就發現唔係咁簡單,當你長時間工作完,原來係沒有任何收入,很正常跟公司關係會愈來愈差,當時我23歲,好好彩,認識了一位PR姐姐,介紹了參加《偶像練習生》,終於可透過自己的實力去搵機會,直到呢一刻,唯一感恩就係因為有呢一段經歷,導致到可以參加選秀節目,再繼而玩到《全民造星》。」

33577253_1994399364148808_2429256124210348032_n

細貓經常被指是第一批被花姐睇中加入MIRROR的參賽者,他解釋:「玩節目的時候與內地公司都已經打緊官司解約,其實到而家都未完晒,情況比較尷尬,選擇做獨立歌手,主要係因為這次經歷,唔夠膽再同其他人合作,同埋並不是特登唔去同MIRROR嘗試溝通,花姐的確有問過我,但當時根本未成形,可能最終他們都不會選擇我,唔係我冇選擇他們。」

細貓小時候是肥仔一名,因不喜歡與阿哥比較而選擇修讀音樂。
細貓小時候是肥仔一名,因不喜歡與阿哥比較而選擇修讀音樂。

決定做獨立歌手,細貓與經理人各自出錢投資,「一開頭每人出30萬,但係第一年真係用最多錢,第二年最難捱,又因為疫情,連公開表演都冇,完全零收入,第一年埋單收入係得八千蚊,幸好,現在已經不用再出錢,公司已經營運到。」

細貓選擇低調處理感情事,用新歌《You're Gone》表明立場,他說:「經一事長一智,經歷這次自己都成長了。」
細貓選擇低調處理感情事,用新歌《You’re Gone》表明立場,他說:「經一事長一智,經歷這次自己都成長了。」

事業慢慢上軌道,突然被模特兒前度大爆拍拖內幕,細貓選擇低調處理,只用新歌《You’re Gone》表明立場,「上年經歷好多高低起跌,遇到低潮的時候,發現身邊都會有些人會離開,其實上年真係算低潮,最主要是自己精神狀態唔係太好,當時好唔開心,不停搵朋友傾訴,有些朋友知道我情緒有問題,陪我去旅行。」細貓當時亦需要看醫生處理精神狀況,「去搵專業人士,都有食藥,仲食緊,但係最主要唔想屋企人睇到,他們當然擔心啦,阿媽簡直係嬲到爆,其實感情嘅嘢每件事都是雙向,唔講唔代表係乜?我都係想保護返所有人,唔想屋企人擔心,我諗呢件事特登走出來講,係百害而無一利,不過,你係咪話自己完全係冇問題?咁梗係唔係啦,我自己都承認,每一段感情裏面,大家都一定會有他們的問題,我亦都唔係完美。」

22年舉行首個演唱會口碑很好,跳得唱得的細貓被一致睇好。
22年舉行首個演唱會口碑很好,跳得唱得的細貓被一致睇好。

單親家庭長大,細貓習慣報喜不報憂,「好細個阿爸已經離開呢個世界,我當時4歲,好似係隔離枱飲醉酒而被打死,淨係判咗一兩年誤殺,我後尾先知啦,我好少交代自己屋企事,屋企得我同阿哥,所以細細個目標就係生性搵錢照顧阿媽。」

首次參與電影,戲中飾演一位富二代,細貓直言與現實很大反差。
首次參與電影,戲中飾演一位富二代,細貓直言與現實很大反差。

細貓去年首次拍攝電影《拼命三郎》,戲中飾演富二代,他笑言同現實大反差,「我做練習生日日都返便利店,唔食煙要記晒所有煙牌子,廚房做過、翻譯做過、搬行李都做過,大家平時去機場check in完啲行李要運送,會先儲埋一堆,我記得大概儲夠286公斤,就要推去上機,返工仲要穿一對防撞腳,行李要逐件pack好,拍戲嗰陣個個都話我個樣都似富二代,其實完全係另一回事。」

Do姐主持的旅遊節目《去邊啊Do姐》邀請五位年青偶像,細貓是其中一位。
Do姐主持的旅遊節目《去邊啊Do姐》邀請五位年青偶像,細貓是其中一位。

 

場地:SUIT Izakaya & Sake Bar

 

 

 

Wanna One 朴寶劍 木村光希
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹