台慶劇《下流上車族》昨晚（28日）播出的一集，飾演「車志明」的林敏驄的感人喊戲感動不少網民，劇情講到志明和老婆雯慧（江美儀飾）吵架，搬去老友細孝（鄧智堅飾）家中暫住，順道向「哎吔阿媽」毓霞（鮑起靜飾）發動爭奪公屋計劃。
志明深夜去到毓霞家中，發現她正在為自己安裝神主牌並慨嘆：「我自己個神位，我唔搞邊個搞呀！我個仔依家連電話都唔聽，個孫要跟埋阿媽姓，唔使旨意佢哋幫我安神主牌！」就在毓霞意志力最薄弱時，志明趁機稱呼「阿媽」討好她，又裝哭：「我阿媽走嗰陣，我遲遲都唔幫佢安神主牌，我唔肯接受呢個現實，我同個天講如果肯俾返個阿媽我，乜都得！但係事與願違乜都冇發生……我萬念俱灰諗住同阿媽走同一條路……」之後志明說全靠老婆一直給予支持才度過難關，成功氹掂毓霞落疊，還鬼馬地將過程錄音，拿給老婆「邀功」。
不過原來志明在毓霞家的表現是「戲假情真」，與老婆重修舊好後，在開車載老婆上班期間突然錫了老婆一啖，真情剖白：「多謝老婆，你係我嘅天使！」他接着又淚崩說：「我同老小三（毓霞）講嘅嘢全部都係真，嗰時阿媽走咗，喺我最Down嘅時候有你出現，俾咗啲希望我，仲俾埋頭家我……」心疼老公的雯慧立即錫返志明，作出安慰：「我要多謝你就真，你肯搵我做你老婆。」此時聲淚俱下的志明再說：「係我累你冇咗層樓，仲要返嚟舊屋做工人……」阿驄與美儀合力晒演技派洋蔥，加上劇組有心思的劇情鋪排，在短短一分半鐘的場口，成功引爆網友淚水，留言大讚：「癡線，一秒入戲」、「平時硬硬淨淨，一秒變番細路」、「上一場扮嘢嗌阿媽，下一場喊到口震，完全兩種戲，真係好勁。」
阿驄受訪時透露，當日一Take過完成拍攝：「事前講好晒要點拍，試嗰時係冇喊出嚟嘅，到真係Roll機就喊咗出嚟，拍完呢場戲見到啲化妝、服裝同事企晒出嚟，佢哋話感動到喊。初初拍完呢場以為已經好勁啦，但相比後面嗰啲戲只係小兒科！」美儀亦表示幕後同事睇到喊，因為這場戲得悉阿驄是性情中人，「嗰場戲係開工第二日就拍，亦都係佢第一場喊戲，同埋呢場係佢自己話要喊嘅，我都俾佢感動到！」她錫了驄哥一啖的一幕，原來是臨時加碼，「劇本冇寫嘅，都係隨住個心同埋感覺做出嚟。」
