王梓軒一連兩場的《CROSSING 源‧樂 演唱會》將於明天（20日）舉行，時隔7年再次踏上舞台，王梓軒最近三個月進行密集式綵排，除了做Gym操肌外，更密密練歌，務求令入場觀眾大飽眼福，聽出耳油。
聽日就正式開騷，王梓軒為了做到完美，他決定將綵排時間加長，由朝排到凌晨，寧願瞓少啲都要唱得好，梓軒話：「我呢個星期每日都係瞓三、四個鐘，臨瞓前都會諗吓個騷有咩要改，希望聽晚大家感受到我同一班戰友及小朋友嘅努力，有一個愉快嘅晚上。」
再踏上會展舞台綵排，王梓軒一拎起小提琴就覺得百感交集：「7年前，我都係喺呢個舞台上開首個演唱會，今次再踏上台，好多回憶湧晒出嚟，音樂總監同上次一樣都係我師傅趙增熹，7年前，佢對我好嚴謹，我好緊張，真係打醒十二分精神去做，但今日再同師傅合作開騷，感覺完全唔同咗，我冇嗰種壓力嘅緊張，我見到師傅同其中一位最細年紀嘅小 朋友練歌時，我仲見到佢好有父愛，其實呢個騷真係好有愛，我聽晚同後晚會用二百分力去演出，希望入場嘅觀眾enjoy。」
