里安納度狄卡比奧(Leonardo DiCaprio)近年積極做幕後工作，今次佢監製的《箭神‧第一戰》(Robin Hood)就力捧《皇家特工》新仔泰隆艾格頓(Taron Egerton)做新一代「羅賓」，又揾嚟老友占美霍士(Jamie Foxx)同《格雷的五十道色戒》男星占美杜倫(Jamie Dornan)參演，成套戲男人味爆哂燈！
今年28歲的泰隆艾格頓自從被選中主演《皇家特工》後，星途順遂，雖然外型細粒咗少少，但勝在靚靚仔仔，生得一幅孩子臉，所以觀眾緣不俗。里安納度亦睇中佢呢點，所以找他來主演《箭神‧第一戰》。喺預告可見，泰隆的角色精於射箭，喺戲中仲得到占美霍士的扶助，不少影迷都期待佢兩位可以擦出咩火花。至於占美杜倫的叫座力亦不容忽視，《箭神‧第一戰》係佢繼《格雷》系列後的大片，網上有不少女粉絲已經表明一定支持！
電影講述泰隆艾格頓飾演的「羅賓」Robin Loxley隨十字軍征戰多年，由於佢智勇雙全，令占美霍士飾演的敵軍首領Little John都深表佩服，義務護送他回到家鄉諾定咸。但羅賓發現家鄉莊園盡毀，民眾一貧如洗，罪魁禍首正是貪污瀆職的郡長(班曼德森Ben Mendelsohn飾)。更慘情是與羅賓青梅竹馬的Marian因誤信佢戰死沙場的報信，而轉投占美杜倫飾演的政客Will Tillman懷抱。憤憤不平的羅賓於是與Little John決定成立地下軍，對抗統治者的暴政拯救萬民，正式打出革命性第一戰，踏上成為一代傳奇俠盜的路途！電影將於今年十一月上映。
圖片&影片來源：英皇電影(香港)有限公司