泰片熱潮越吹越勁，繼去年《出貓特攻隊》創票房奇蹟後，幕後班底精心炮製的新作《大佬可以退貨嗎？》亦即將上映。這部輕喜劇由人氣影帝Sunny、韓國2PM成員Nichkhun與泰國國民女神Yaya主演，三個靚仔靚女叫座力驚人，在泰國當地上映一周即破《出貓特攻隊》的總票房，人氣超勁！
男主角Sunny下星期就會女配角Ploymon及導演維達也湯于容訪港同觀眾見面，令到成班Fans鬼死咁期待。行型仔路線的Sunny樣貌才華兼備，曾經憑另一小品《戀愛病發》獲封泰國影帝，今次他在《大佬可以退貨嗎？》與女神Yaya飾演兄妹，不過呢對兄妹十足前世撈亂骨頭，由細到大無論學業成績抑或工作表現，細妹都叻過大佬成街街，自尊深深受創的大佬唯一的反擊方法，就是令細妹嫁唔出，片中Sunny出盡渾身解數嚇走哂細妹的每個男友，見到她識到荀盤Nichkhun就更加開大火力，誓要拆散一對小情人。
戲入面Sunny古靈精怪，但現實中的他亦一樣極有諗頭，被劇組一致同意是飾演「癈」大佬的最佳人選，經常喺片場失經無神整蠱人，與他有最多對手戲的Yaya首當其衝經常「受害」，比如Sunny經常當眾笑佢耳仔細、笑聲超大等等，狠狠打擊對方的女神形象，激到Yaya紮紮跳。嗱，一於等Sunny下周訪港，由他親自再向跟大家分享更多癲喪事！
圖片來源：安樂影片