以船梨精為首的重金屬樂隊CHARAMEL會於9月1 日首次在九展舉行演唱會。
日本近年大人氣的吉祥物除了熊本熊外，仲有同佢好老友的「船梨精」。船梨精同佢一班爆笑又勁萌的Band友組成的樂隊CHARAMEL將於 9月1日襲港，喺九展Rotunda 2開騷，大玩重金屬Heavy Metal搖滾樂，你會估唔到佢地技術高超Rock到爆又癡癡地線地超爆笑，睇過佢哋表演的粉絲都話有意想不到咁正同療癒！
CHARAMEL隊員包括（左起）船梨精、惡魔熊、河童君、貓蘋果Star，位位音樂造音深厚。
「擅自」擔當千葉縣船橋市吉祥物的船梨精，佢做主音嘅Metal Band CHARAMEL，成員仲有北海道札幌市的結他手惡魔熊、埼玉縣志木市文化體育振興公社的吉祥物低音結他手河童君、青森縣黒石市的鼓手貓蘋果Star。
惡魔熊結他了得，隨手可彈出美國搖滾班霸Guns N』 Rose的名曲。
河童君、惡魔熊和貓蘋果Star都是具有極為深厚音樂底子的吉祥物，平常出席地方活動時就會現場表演樂器。惡魔熊嘅結他技術厲害，佢平日喺event隨手可彈出美國搖滾班霸Guns N』 Rose的名曲，仲有支黃色有紅色心心的電結他好似模仿X JAPAN已故結他手HIDE支招牌結他。
鼓手貓蘋果Star演奏X JAPAN的名曲《紅》亦甚有睇頭。
鼓手貓蘋果Star原來亦非常崇拜日本Visual Rock樂隊 X JAPAN ，佢經常模仿X JAPAN隊長YOSHIKI打鼓，演奏X JAPAN的名曲《紅》、《Silent Jealousy》等，仲喺YOSHIKI同LUNA SEA鼓手真矢及結他手Inoran面前表演過，令幾位日本搖滾巨星好驚訝兼笑到肚孿。貓蘋果Star喺CHARAMEL的演唱會solo時用鼓棒交叉成 X 形狀的手勢，都係模仿 YOSHIKI，令觀眾都忍唔住會心一笑。
《火熱動感La La La》原唱樂隊爆風SLUMP的主音Sun Plaza中野，去年為CHARAMEL作歌兼擔任演唱會表演嘉賓。
唔講唔知，幫CHARAMEL作歌嘅音樂人亦大有來頭，佢係Sun Plaza中野，以前係日本樂隊爆風SLUMP主音，90年代紅極一時的廣東歌《火熱動感La La La》就係由爆風SLUMP原唱。
Sun Plaza中野都全程擔任CHARAMEL去年在日本四大縣市札幌、名古屋、大阪及東京舉行的Livehouse tour的表演嘉賓，這幾個又萌又癲的吉祥物本來面無表情，配上強勁的打鼓、刷弦投入動作、精湛音技，以及船梨精愛扭動身體同飛跳的瘋狂台風同爆笑吐槽，登時帶出突兀爆笑效果，令觀眾忍不住喝采，睇過佢哋表演的粉絲都話有意想不到咁正同療癒！
CHARAMEL今年再接再厲，展開2018年日本全國夏季巡迴演唱會，而且首度衝出日本，以香港作為亞洲第一站演出，到時會場應該會有大批可愛到爆的紀念品發售，而持票觀眾仲可獲贈紀念品！
撰文：張一明
圖片：互聯網