Advertisement

【笑死粉絲】死侍上門搵碧咸道歉 變數賴恩爛片

外國
2018.05.11

由加拿大男星賴恩雷諾士主演的《死侍2》下星期二香港正式上映,噚晚又出咗條超爆笑玩嘢嘅宣傳片,今次有萬人迷碧咸親自上鏡。

係粉絲就應該記得,《死侍》第一集有場戲,係賴恩取笑碧咸「講嘢聲音聽起來似同氦氣口交」,即係話佢講嘢陰聲細氣好難聽。段新宣傳片就影住碧咸喺屋企睇緊《死侍》第一集,睇到死侍串緊佢嗰場戲,佢就fast backward倒片睇多次,此時收到死侍用手機傳短訊向佢道歉。

碧咸露出好唔在乎嘅表情,突然有人登門造訪,打開門就係死侍送上愛心曲奇同牛奶,碧咸即關門。跟住死侍又拍門,扮碧咸雞仔聲送上汽球,一樣被碧咸拒絕。死侍再同墨西哥樂隊唱歌,都係道歉失敗之後,佢再拍門向碧咸送上兩張世界盃球賽門票,才令碧咸開心晒,仲好諷刺咁講:「我好心急想去睇冇咗意大利同荷蘭嘅世界盃。」跟住死侍死攬碧咸唔放,仲大讚佢個身好香有肉桂味同男人味。

條片未完仲有好笑嘢,碧咸問死侍上門為乜,死侍問返碧咸佢應該為乜道歉,碧咸就數返賴恩以前演出過嘅爛片,包括《綠燈俠》(Green Lantern)、《衰鬼刑警》(R.I.P.D.)、《換命遊戲》(Self/less)、《幽靈刺客III:終極屍殺》(Blade: Trinity),死侍都好同意係爛片,但當碧咸數到賴恩在千禧年演出的《Boltneck》,死侍好激動話呢部係佢心目中的經典,又來大吵大鬧,搞到碧咸又怕咗佢要關門,死侍又喺門外不停道歉。

skynews-deadpool-david-beckham_4306321

賴恩仲喺Instagram上載佢除下面罩同碧咸嘅合照,兩人老友鬼鬼。

之後,賴恩仲喺Instagram上載佢除下面罩同碧咸嘅合照,兩人老友鬼鬼。外國網民都覺得條片好搞笑,仲有唔少網民,甚至外國娛樂網站齊齊研究返賴恩以前演過乜嘢爛片。

撰文:張一明

圖片來源:賴恩雷諾士@Instagram

 

 

聲夢傳奇 莫文蔚 姜濤
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹