大島優子自從脫離AKB作個人發展後，一直努力打造專業演員形象，去年終於憑《紙月人妻》贏得多個最佳女配角獎。不過，大島似乎過於心急轉型，最近為雜誌《Friday》拍的一輯寫真走熟女路線，但好明顯捉錯用神，一頭蓬鬆長髮配黑色喱士裙或肉色開胸裙，都顯得她猶如中年怨婦。不少粉絲見偶像廿七歲便淪為大媽，紛紛在網上留言：「十足昭和年代」、「似近四十，老過永作博美、Yuki」，亦有行內人譏笑大島「化妝、表情、甫士全部錯晒」。其實扮老絕不等於演技好，希望大島汲取今次教訓。
