台灣偶像劇盛行時期比韓劇仲要早，當年嘅少男少女放學放假最鍾意留喺屋企煲劇，呢班台劇女主角實在係伴隨著一班情荳初開嘅九十後成長。以下呢四位經典台劇女主角你一定認得，依家既你有得揀既話，最想邊個角色做你女朋友呢？
林依晨雖然外貌唔算好靚，但演戲卻有一種魅力，《愛情合約》中首次擔當女主角時，仲包辦埋片尾曲。但真正令她紅起來，係同鄭元暢合演嘅《惡作劇之吻》，湘琴同直樹嘅故事無人不知。《惡作劇之吻》入面，袁湘琴係一個單純開朗、心地善良嘅高中女學生，有顆純潔少女心，個性憨厚直接、樂觀有耐性，但頭腦唔好，對家事一竅不通、笨手笨腳，但總會努力不懈咁朝目標前進。
楊丞琳初出道時樣子青澀，第一部劇集係2001年《流星花園》中擔當女配角，但之後演出多部電視劇女主角後大熱，仲成為眾人心中嘅「可愛教主」。《惡魔在身邊》裡面，齊悅係大學二年級學生，處事低調，唔會特別去惹人注意，但因為性格平易近人，結交咗唔少朋友，但從未真正談過戀愛。《海派甜心》入面，陳寶茱係廣播電台人氣DJ甜心小姐，雖然笑容同聲音甜美，長髮隨風飄逸，眼睛大到似漫畫女主角，但骨子裡係個不折不扣嘅野丫頭，個性非常男孩子氣，活潑而有正義感、有自己原則，而且識柔道！因為成日路見不平出手，所以外人覺得佢難相處，但其實佢內心好渴望得到關愛。
陳喬恩化淡妝有一種純樸美，22歲出道就馬上參與首部偶像劇《薰衣草》，但最為人所知嘅劇，一定係大獲好評嘅《王子變青蛙》同《命中註定我愛你》演一段灰姑娘遇上王子嘅故事，風靡港、台兩地。陳喬恩飾演《王子變青蛙》葉天瑜個性活潑、樂觀開朗，腦筋動得快，聰明伶俐，但由於從小受追債佬常上門追數嘅影響，為錢能夠睜大眼講大話，夢想係搵個金主過有錢生活。而《命中注定我愛你》嘅陳欣怡生長喺一般勞工家庭，連名字都係全國最普通既「欣怡」，於法律事務所處理雜務，性格溫和樸素、願望很小、欠缺主見、好似便利貼咁，功能雖小、唔起眼，但生活中卻唔可以缺少。
S.H.E Ella無論演戲定唱歌都一樣出色，出道不久就演出第一部劇集《愛情大魔咒》，但當中最經典角色一定係《薔薇之戀》嘅鄭百合同《花樣少年少女》男仔頭嘅盧瑞莃。《薔薇之戀》裡面，鄭百合長相平凡，身材微胖，加上唔識打扮，對自己嘅外表有著強烈自卑感，但個性溫和善良，單純無心機，真誠待人，所以容易令身邊嘅人不知不覺中喜歡上她。《花樣少年少女》裡面，盧瑞莃係個樂天活潑、運動萬能、純真率直嘅少女，但頭髮剪短後打扮成一個男生，感情表達好直接，經常笑、怒、睡、吃，行動比思考先行，發生任何事都唔輕易挫敗。
圖片來源：互聯網
影片來源：互聯網