草蜢嘅《草蜢17385世界巡迴演唱會》首站在廣州舉行,距離開騷日只有短短個多星期,草蜢當然要努力綵排,今日蔡一智、蔡一傑同蘇志威在九龍城排舞室,就跳出足本版《三分鐘放縱》。
而西瓜同蘇麗珊就特別探班,蘇麗珊還親自整了一個以森巴舞做主題嘅蛋糕送俾草蜢,嗱!今次演唱會主題係「17385」,呢個數字密碼乜解呢?咪係「一起森巴舞」嘅諧音!所以草蜢答謝西瓜同蘇麗珊,除了送上大會密碼17385T恤,又叫舞蹈員分別舉起二人,仲講笑叫佢哋想像一下呢個係萬人齊聚嘅紅館現場!大家跳住同觀眾見面!