今年開始遊走於廚界與樂壇的「Chef LeMon」謝霆鋒最近又有新搞作！以「Chef LeMon」身分宣傳個人新曲，大晒「鋒」式刀法切鮑魚，又以法式烹調法煮平民撈麵，網民看到嘖嘖稱奇！
繼年初回歸樂壇的頭炮〈有火〉後，霆鋒近日在網上推出另一廣東新曲〈放肆〉，嘗試玩EDM，挑戰新風格。為配合新歌宣傳，他又重拾「Chef LeMon」身分，上載了一段下廚片，邊播新歌邊示範如何用高雅的法式烹調法煮平民撈麵。Chef LeMon首先晒刀法，見他手起刀落，快刀切水蓮後，再切鮑魚！中途更出現「女友視覺」冧粉絲，Chef LeMon深情望鏡頭，再專心下廚，爆發男友魅力。雖然Chef LeMon出盡招數冧粉絲，但仍然「迷惑」不到部分網民，有眼利網民直指Chef LeMon揸刀手勢不正確，笑言乍看以為正用𠝹刀𠝹紙皮箱，而非切鮑魚，又笑問Chef LeMon：「右手食指唔攰？」
Chef LeMon淥完麵再細心撈麵，最後仔細放上砌好的鮑魚片伴碟，再灑上水蓮碎。追求完美的Chef LeMon一貫大廚的堅持，堅持抹走碗內多餘的醬汁，以完美的「法式料理」的形象呈現平民撈麵，在抹碗後的瞬間，Chef LeMon即手執筷子，快手撈勻法式撈麵再享用，網民見狀即大表「心痛」，想欣賞多一秒撈麵的精緻賣相都沒機會：「擺得咁辛苦又要抹碗，轉個頭你撈勻佢食。」
影片來源：謝霆鋒《鋒味》@Facebook