杜德偉（Alex）今日推出新歌 〈妳在我的愛情裡〉MV，驚見有份合唱的 Michael Jackson 家族成員B.Howard 現身撐場！眾所周知，Alex 是已故巨星 Michael Jackson（MJ）的頭號粉絲，原來 B.Howard 與 Alex 甚有淵源，早在 2009 年 MJ 過世時，Alex 為偶像在港舉行追思會，當時並透過黑人朋友介紹下結識到 MJ 家族成員：「當年 B.Howard 都有嚟到香港，我同佢去咗探訪孤兒園、主題公園玩，之後都有一直保持聯絡。我覺得佢好可愛，同埋真係好似 MJ，無論身體比例都係手長腳長、講野表情，仲有特別係佢把聲係最似。而今次透過呢首歌，令我好似同我偶像合唱，我覺得係一件好精彩嘅事！」
而 B.Howard 為撐 Alex 可謂出心出力，特意由美國飛抵韓國拍攝 MV，落機後便匆匆趕到片場拍攝，二人在短時間內拍攝遊車河睇夜景、玩煙火等鏡頭。Alex 憶述：「佢當日好辛苦，一落機就要埋位，喺片場沖涼換衫。同埋佢真係帶畀我好多豐富嘅經驗，因為佢介紹咗我認識『格林美』級數嘅音樂幕後團隊，促成嚟緊我呢隻碟每首歌都可以同唔同嘅高人合作。」
Alex 今次拉大隊遠赴韓國取景拍攝，由當地攝製團隊操刀，為了追趕進度，更連續 25 小時通宵拍攝。雖然 Alex 捱眼瞓拍攝，不過卻無阻他將 MV 變成個人 Fashion Show，短短在4分鐘的 MV 裡，已換超過10套靚衫，而且每套衫都是出動私伙：「因為我好鍾意時裝，所以由出道到依家開始，對自己造型已經好有睇法，記得第一張唱片《只想留下》個封面，由背心去到皮褸、牛仔褲都係自己襯，每張唱片都想參與，咁先保持到自己百分百風格。」
Alex（右二）邀得B.Howard（中）合作，又拍MV又合唱！
Alex原來和B.Howard相識多年，老友鬼鬼！