陳奕迅（Eason）目前身在美國紐約，剛於昨日（31/8）上午完成首場紐約的巡唱第一站演出，為了獎勵頭場圓滿成功，他完騷後翌日即去觀看美國網球公開網球賽，接着還有五個地方演出，才再回歸香港。
Eason紐約首場全場爆滿，他高興說：「我非常開心，亦很感謝在座你們每一位，我愛你們。我知道好貴，係咪係美國乜都貴？我瘦咗呀，日日熱狗漢堡飽，冇啖好食，哈哈…其實係因為我好鍾意食唐餐，但我剛去食了碗越南粉，叫咗碟春卷，炒個菜，7個人二百幾三百蚊美金，你哋話我知係咪俾人打劫？所以我好多謝你哋，可以留返咁多錢去睇我個騷，真心非常感謝。」他又搞笑道 : 「今晚我見到好多靚人，男仔女仔都靚。有人舉牌Eason錫啖，咩意思？嘩，你係男人喎，but it’s ok, I don’t care.」當觀眾真的向他送吻，他即大叫：「嘩！你嚟真，唔好啦，公眾場合！」引得全場哈哈大笑。又有男歌迷舉着他的大頭像還穿上十幾年前DUO演唱會的T-Shirt，Eason看到後指着對方說：「嘩，你真係真粉！件衫十幾年前啦喎，簽名？唔好要我簽名啦，我夠核突啦個樣，重要我簽個名係自己個頭到！」
觀眾不停叫Encore時，Eason說：「我都想唱到凌晨5點，但真係做唔到，場館有限制。」最後他唱了《孤勇者》讓全場興奮到極點，繼而因為觀眾太熱情，他再送上《淘汰 》給觀眾。
