許靖韻（Angela）今日（2日）推出全新廣東作品《偷東西的女孩》， Angela以往推出的歌都是慘情歌中被傷害的一個，今次決定來個大反轉，講述Angela主動地去傷害人。
新歌是一首講偷情、出軌的歌曲，問到Angela有否類似經歷？她坦言試過「被派帽」，「入行前有被出軌過嘅，一開始有好多唔甘心嘅情緒，或者想嘗試原諒對方，但最後都係分手收場，因為覺得有好多嘢對方做錯咗，自己接受唔到，就會信任破裂，埋下咗唔相信嘅種子，咁就好難繼續走落去。近年啲朋友同fans都有好多類似經歷嘅分享，咁我儲埋佢哋呢啲嘅經歷，所以今次喺感情演繹同創作上都好有幫助。」
Angela大讚這次的MV內容及前期鋪墊十分有心思，「之前拍MV唔會有角色名，今次有個角色名，我嘅角色叫Mia，佢亦都係有職業㗎喎，係一個愛情專欄作家。成個故事係好完整，感覺好似拍緊一部微電影多過MV，我幾鍾意呢個感覺，因為令到首歌嘅層次感再多啲，可以表達到更多。另外，MV有一個幾深嘅鋪墊，團隊特登幫Mia開咗一個IG account，大家可以去follow佢，哈哈。因為『佢』係會不定時咁share佢對愛情嘅觀點，將MV入面一啲嘢擺喺真實世界。」