相隔5年，草蜢再踏紅館台板，今晚（26日）起舉行一連4場《RE: GRASSHOPPER CONCERT》。 出道37年的草蜢，貴為香港男團始祖，一早已經預告今次個唱會帶來全新的「草蜢2.0」，果然今次的2.0有心有力，唱跳3粒鐘一樣有衝勁！
今次開四面台，頭場8:35分開騷，草蜢圈中好友容祖兒與媽咪、黃子華、蘇永康、關心妍兩公婆、盧巧音和老公Sammy、童愛玲等人捧場。草蜢以一曲《Lonely》曬柔情mood見面禮，之後先嚟料連串快歌，第三首歌《三分鐘放縱》開始，全場企晒起身跟住一齊跳，之後的《紅唇的吻》、《失戀》、《ABC》，觀眾都跟住一齊唱，全部都是草蜢快歌的回憶殺。
跳完一輪到正式同觀眾打招呼，5年冇見，蔡一智大叫「唔好留力」、蘇志威則話：「下次可唔可以唔好再等5年咁耐？5個月得唔得？」蔡一傑就話既然收到經理人林珊珊話「唔好留力」，咁就要大家做吓「運動」，傑仔話：「草蜢嘅傳統梗係人浪啦！」話口未完，全場觀眾即刻聽住指揮，紅館全場人浪high爆！
