佘詩曼（阿佘）相隔多年重返娘家TVB拍攝劇集《新聞女王》，今日與馬國明、李施嬅、何依婷、王敏奕等演員在邵氏影城拍攝新聞部廠景。阿佘表示對劇本和導演拍攝手法充滿信心，指各人也用心演好角色，相信完成品會令人滿意。
問到休息時間可足夠？阿佘說：「一時時，如場戲好緊要都會長時間捱下。監製鍾澍佳會盡量錫住演員，對女仔會好啲，因為話拍出嚟女仔唔靚冇着數。馬國明可能慘少少，唔緊要，佢天生麗質。（你氣場勁，有冇嚇怕新進演員？）邊有呀！開頭可能大家唔太熟落，依家再問佢哋應該冇。」
阿佘在劇中飾演新聞主播，她指角色有很多專業對白，而且要講得順暢，演出時很有難度，她就趁不用埋位時背默幫助記對白，所以拍攝場地周圍都有她寫過的紙。阿佘更謂為演好角色，去了新聞部借錄影廠練習了好多日，並笑言有興趣客串報天氣。
對一班同劇後輩，阿佘直言很喜歡王敏奕︰「佢第一日埋位已準備得好好。第一日同佢開工，佢已投入角色，演出感動到我。佢唔止同我有化學作用，仲好強，所以我好鍾意佢。」至於有哪位演員有待進步？阿佘笑道：「我自己啦，沒有最好，只有更好嘛！」
被點名稱讚的王敏奕說：「我都好多謝佢，當初收到劇本，我做好多功課，因為知道可以同阿佘對戲，我都好緊張，戰戰兢兢咁去做，咩都唔理，做好自己先。第一日拍時，我超級緊張，阿佘拍完都有同我傾，好感動。」她覺得阿佘氣場勁，人又正又靚，每次望住對方雙眼就被迷魂到不會演戲。王敏奕說：「阿佘係個非常慷慨嘅前輩，不論喺演戲或生活上，都好歡迎大家去問佢，唔會令人有種接觸不到嘅感覺。」
