昨日（16日）是泳兒（Vincy）的生日，壽星女就趁生日上載了一段由張敬軒及唱片公司同事炮製的驚喜生日會片段，公開表揚一眾用心又演技精湛的朋友。
上周五，Vincy到張敬軒錄音室為第四隻Hi-Fi碟錄音，錄音期間，軒仔忍住笑挑剔Vincy的表現，不滿她「甩beat」，又黑面指她未準備好就錄音是浪費時間，最後演技爆發的軒仔更嬲到走出錄音室。Vincy全程一臉茫然，呆站原地。
後來同門師妹陳凱彤（Lillian）捧住生日蛋糕，跟軒仔及一眾同事衝入錄音室大唱生日歌，嚇到Vincy黐埋牆，最後搞到Vincy又喊又笑。軒仔事後都瘋狂向Vincy道歉，笑言看着Vincy捱鬧的無辜眼神似在強姦他的良心。
Vincy則指軒仔令她失去了信心：「好驚，未見過張敬軒咁惡。之前同佢錄另一隻歌佢都會讚我，今次好似令到佢好失望。佢啲戲真係實在太好啦，明明我自己有數緊beat，但係佢令到我都開始唔相信我自己。」Vincy表示軒仔離開時想追出去：「諗住同佢say sorry，但我都嚇到有啲呆呆哋，都唔知點做。我有一刻懷疑自己係咪發緊夢，我喺度諗：『點解全世界都喺度鬧我嘅？』哈哈。」