龔慈恩、蔣祖曼、朱敏瀚、朱晨麗、歐瑞偉、韋家雄、楊卓娜、王綺琴和寶珮如等人，今日（1日）出席《輕•功》之「再飛一次」宣傳活動，工作人員安排楊卓娜玩空中瑜伽助興，而朱晨麗亦不甘示弱，即場表演空中一字馬，令眾人拍爛手掌。劇中龔慈恩與黎耀祥飾演夫婦，她大讚祥哥完全帶她入戲，「好開心，佢係一位好好演員，我哋演拍拖情侶真係好享受，始終我哋嘅年紀演感情戲都會怕羞，但祥哥俾咗好多鼓勵我，叫我放膽演，年紀大都可以好sweet，原來人與人之間嘅感情係可以無限，唔需要太多隔膜，可以好溫馨及體貼，令我很舒服去演，反而太親熱嘅場面就無，留返俾後生，甚至叫我睇下佢太太，睇佢幾嬌俏。」
囡囡林愷鈴於ViuTV演出的劇集《繩角》演技受讚賞，問到她怎樣支持囡囡，「大家平時都會一齊睇劇本、睇戲，會去傾，但我好難變回佢哋嘅年紀去同佢傾，所以大家主要係傾基本嘢。」
黎耀祥雖然今日未能出席宣傳活動，但工作人員特別安排視像對話，祥哥說：「現在我在杭州工作，返唔到嚟宣傳，麻煩晒大家幫手落力宣傳，劇中我飾演一位武師，同龔姐演夫婦，但佢會離開我，而我要適應無伴侶生活，學識放輕人生，同龔姐合作當然開心，佢好有氣質，同角色好吻合，佢飾演一位好靚嘅超級巨星，後來委屈嫁俾我，劇中大家磨合得好快就已經有默契。」
