林盛斌（Bob）太太去年幫他追到慈姑掟「大兜仔」，一家六口加埋兩位家傭，身為一家之主的他要養起成頭家真的不容易，日日做到無停手，好似「大兜仔」上周一歲生日，阿Bob去咗加拿大做嘢，情願只逗留一天，來回飛三十幾個鐘都飛返來同囝囝慶祝，認真風塵㒋僕僕；今日，阿Bob於社交網站上載了一張身在醫院的照片，照片裏手臂插針，留言話自己一直心口都有少少痛，以為好少事，點知原來好大鑊，要通波仔，仲唔止通一次。
上周剛從加拿大趕回香港同囝囝慶祝一歲生日，怎知今個星期就入院做手術，世事無常。
阿Bob話：「手術成功，三條血管塞晒，通咗兩條，仲有一條要過兩個月先再做，呢幾日要好好休息！醫生都話好彩及早發現，遲多幾日就會不一樣，雖然手術成功率百分之九十幾，但始終仔細老婆嫩，都咪話唔驚，今次之後，自己都開始會檢討一下平時生活習慣，都會減少一些工作。」問到家人是否很擔心？「好多謝太太連日來的照顧，她都有勸我之後注意飲食，小朋友就無講太多俾佢哋知，只知我入院做身體檢查。」
阿Bob話日後要多做運動，改善生活習慣。