壽星女楊丞琳今年同屋企人一齊慶祝生日
壽星女楊丞琳六月四日生日當天PO文透露與家人一齊慶祝生日，表示沒有生日願望要許，因為依家已經好幸福、好滿足，並附上與家人、朋友食飯的照片，擺滿一張枱的美食照特別註明，由母親做二廚，事前買好所有材料兼洗乾淨、切好，然後大廚煮到滿頭大汗，炒菜炒得好辛苦，不過呢個生日大餐至親好友都食得好開心！
楊丞琳嘅生日大餐超豐富
楊丞琳平時最鍾意食媽咪煮的餸，生日阿媽竟然降級做二廚，邊個係大廚呢？就是刻意避開鏡頭的男朋友李榮浩，未來女婿好體貼，每年女友生日，佢都專程飛到台灣，親自為女友的至親好友下廚，兩人拍拖三年，李榮浩已經做咗三年「生日大廚」，每年六月四日搭正午夜十二點，都在微博祝女友生日快樂，今年更浪漫，「祝我家少女生日快樂！」三十四依然是男友眼中的少女，難怪楊丞琳話好幸福兼好滿足。
李榮浩在大陸被譽為年輕一代最有才華的音樂人，雖然眼仔細細唔靚仔，不過佢對女友的體貼兼細心，已經成為暖男指標，雖然佢比女友細兩歲，但楊丞琳話男友非常成熟，好識照顧佢，更經常煮飯俾佢食，會特別研究啱佢口味的菜式，每次都令佢食得好滿足，所以佢不單是幸福的女人，更是有口福的女人。
李榮浩在內地被譽為年輕一代最有才華的音樂人
楊丞琳十五歲出道，之前的男朋友都是靚仔型，包括小鬼黃鴻升、賀軍翔、邱澤、元駿豪、王陽明，最終卻是憑才華俘虜「少女心」的李榮浩，有才華兼細心又體貼，楊丞琳一早表示遇到「對的人」，雖然結婚還有一段距離，不過這段異地戀早已得到粉絲祝福，大家都希望兩人可以開花結果。
部分圖片來源：楊丞琳@微博