香港電影業有苦自己知，要拍攝香港地標的外景，就算入紙申請都未必批准，唯有嘥啲錢自己砌，嗱！好似Juno拍《風林山火》就砌咗條銅鑼灣道，《掃毒2》就搭咗1:1中環地鐵站；由古天樂、宣萱、姜皓文同李燦森等人合作嘅《犯罪現場》，因為要拍鬧市打刧，索性喺佐敦短租地舖，砌間珠寶行出嚟俾古仔打刧！現場見到那間珠寶行的確呃得人，珠寶戒指閃閃生光，當然全部朱義盛啦！
今日，由古仔為首嘅刧匪就位，拍攝一場鬧市槍戰打刧戲，今次古仔只係刧珠寶唔會刧錢？點解？咪因為早前管理道具銀紙嘅案件，業界現在仍然解決唔到，咪索性唔拍道具銀紙囉！
