世界盃打得如火如荼，上星期日德國對墨西哥既F組首戰，墨西哥隊竟然爆冷，擊敗上屆冠軍得主德國隊。咦？點解「Sam哥」會去參戰世界盃守龍門既？其實大家無眼花，呢位就係人稱「墨西哥Sam哥」既奧祖亞（Francisco Guillermo Ochoa Magaña），佢既五官輪廓的確同我地香港既真「Sam哥」吳鎮宇撞哂樣！
爆炸頭既奧祖亞雖然髮型唔似吳鎮宇，但都掩飾唔到撞樣既事實，佢地一樣有粗眉勾鼻，連笑容同皺眉嘅神情都似到十足十，如果話佢地係孖生兄弟都真係會有人信！
正版「Sam哥」吳鎮宇睇完啲相話自己其實好少睇波，但估唔到有足球員同佢咁鬼似樣，所以一直有關注佢。難怪吳鎮宇最近主演既電影《逆流大叔》都喺Facebook專頁開Post抽水，留言：「嘩！鎮宇哥大發神威，力挽狂瀾，背負著《逆流大叔》之名，逆流而上，以１比０擊敗上屆世界盃冠軍得主德國。」仲搞笑到將吳鎮宇同奧祖亞一樣表情既相擺埋一齊！
兩位都係廿四孝爸爸
其實佢地兩位喺足球都有啲相似，吳鎮宇話佢細細個踢波冇乜衝鋒陷陣嘅天份，所以每次都被安排做守門員。另外，佢地都係廿四孝好爸爸，奧祖亞視一對仔女為每日既原動力，就算幾忙都好，都會抽時間陪伴仔女。至於，吳鎮宇呢位口硬心軟嘅嚴父亦出名疼惜兒子，例如早前囝囝Feynman落水受傷，佢就忍唔住一度落淚，重複講「Papa loves you.」。
圖片來源：互聯網、吳鎮宇@微博