張敬軒籌備演唱會之初，問過佢會唔會請關智斌（Kenny）做演唱會嘉賓，好想睇佢哋同台演唱，話哂出自軒仔手筆的《笑忘書》同《預言書》都係軒仔和Kenny的代表作，當時軒仔笑說：「我會唱《預言書》嘅，但我嘅事業係唔係離唔開呢個名？我哋又唔係組合，我又唔係Boy’z！」不過軒仔今次真係加入左Boy’z，嚟到噚晚（父親節）軒仔第四場演唱會，真係送上驚喜，當軒仔唱完Kenny的《預言書》，Kenny真係出場啦！
究竟軒仔點介紹Boy’z出場？軒仔話:「剛做新人時我乜都唔識，見到一班新人裏面有啲artist特別巴閉，佢哋公司人材濟濟，出親嚟都好多髮型師好多助手跟住，但相處落發現佢哋都好怕醜內歛，可能因為同期的關係，我哋到現在仍然都係好要好好好要好的好朋友，今晚係我人生中第一次開六場的演唱會，好想佢哋同我分享，佢哋在各自崗位都發光發熱。」Kenny有五個好架！全場尖叫不絕！今晚係Boy’z做嘉賓呀！
話哂軒仔同Kenny呢對緋聞傳足十年的好朋友，好難得同台表演嘛，現場fans真係好興奮，軒仔同Boy’z仲一齊合唱咗《死性不改》，歌迷對Kenny的歡呼聲太勁，Steven呷醋話：「唔使我啦！我走！」軒仔就話：「你個角色好重要。聽講你哋兩個以前為咗我喺髮型屋大打出手！」Kenny話：「你諗多左啦！張生，我哋成日都打架啦！Mani話最緊要唔好打臉。」軒仔說：「Steven噚日仲喺橫店拍緊戲，專程返嚟，恭喜Kenny做業主，黚解你（望住Steven）會肯嚟做嘉賓？」Steven即對住Kenny說:「係啦！點解你肯應承做嘉賓?」
Kenny說:「我嚟報仇嘅！」Steven話:「你報乜嘢仇？隔夜嗰啲？」軒仔說：「排嗰時唔係咁講㗎。」最後大家合唱咗《La La世界》，佢哋四面台走勻，啲fans癲晒！