【出道15周年】Boy’z開騷　邊首經典歌必唱？

張敬軒演唱會邀請Boy’z成為嘉賓帶來極大迴響

「降兩度」張敬軒一連六場演唱會已於上周圓滿結束，成個演唱會「降兩度」同軒仔當然係主角，但估唔到第四場嘅嘉賓Boy’z都帶嚟極大迴響！無他嘅，Boy’z解散咗咁多年再次合體同台演出，九十後睇到唔興奮就假，唔少興奮粉絲仲尖叫到核爆紅館！難怪軒仔喺尾場都好識做即興請佢地上台，一齊encore多次《死性不改》，仲笑住講從未試過有粉絲要求嘉賓Encore，又透露Boy’z即將舉行首個售票演唱會，適逢今年係Boy’z成軍15周年，極具意義，搞到大家都超期待。

Boy’z當年真係好清澀，而家都一樣靚仔，仲充滿男人味

Boy’z最初由關智斌（Kenny）同張致恆（Steven）組成，呢隊男子組合打正「男版Twins」旗號出道，而骨灰級歌迷應該知道佢哋初頭係叫「SK2」（沒錯，與某護膚品牌名字一樣），其後特別舉行咗個徵名比賽改名，然後就以Boy’z之名喺2003年正式出道喇。當年Boy’z出道嘅氣勢非常強勁，完全不輸大紅大紫的師姐組合Twins，第一首派台歌《LaLa世界》甫推出便大受歡迎，同年更橫掃《第26屆十大中文金曲頒獎禮》最有前途新人獎組合金獎、《2003年度叱吒樂壇流行榜頒獎禮》叱吒樂壇新力軍組合金獎等多個新人獎項。

（左）骨灰級歌迷肯定知佢哋最初係叫「SK2」（右）Kenny同Steven 十五年後一樣咁Friend

Kenny同Steven都有着俊朗外表同年少青春既氣質，自自然然俘虜左唔少少男少女粉絲，而佢哋當年推出嘅音樂作品都成為大熱，當中包括：《死性不改》、《情陷百老匯》、《玻璃少女》、《總有一站愛上你》、《手足》、《眼紅館》等等。直至2005年，Kenny宣布離隊單飛發展，Boy’z便先後加入麥子豪（Dennis）和陳偉霆（William），並改名為Sun Boy’z繼續發展，可惜人氣同知名度已不及第一代的Boy’z，最終Sun Boy’z喺2008年解散，麥子豪（Dennis）自感唔適合娛樂圈而告別樂壇，而陳偉霆（William）轉戰大陸，依家已成為內地當紅男星。

（左）Kenny同Steven都有着俊朗外表（右）張致恆（Steven）曾與麥子豪（Dennis）和陳偉霆（William）組成Sun Boy’z

關智斌（Kenny） 2005年單飛後曾推過一些個人唱片，包括《Oncoming》、《Musick》，可惜反應一般。其後決定到內地發展，由四、五線角色做起，最終喺2013年憑《追魚傳奇》走紅，之後每年主力拍不少內地古裝劇，包括《新濟公活佛之狀告濟公》、《秀麗江山之長歌行》等，曾有報道指他拍一部三十集劇集勁收三千萬。張致恆（Steven） 2008年解散Sun Boy’z後，2010年再與關智斌重組Boy’z，可惜之後作品不多，而且甚少一齊出席活動，所以二人實際上已分道揚鑣。其後，他簽約無綫電視，演出過《神鎗狙擊》、《巨輪II》、《波士早晨》等多部劇集，轉戰公仔箱，直至2017年約滿英皇，結束15年賓主關係。

Boy’z同Twins合唱嘅《死性不改》真係超經典

最後，最後，呢隊男子組合幾經辛苦終於再次合體，如果佢哋開演唱會，你又最想聽Boy’z唱邊首歌呢？

圖片來源：互聯網、關智斌@Instagram