《阿SAM & 阿TAM HAPPY TOGETHER演唱會 PART ll金曲速遞 》於今晚（5號）正式開鑼，阿Sam和阿倫率先送上一條短片給歌迷熱身，二人重現綜藝節目《鬼馬雙星》其中「邊個夠我威」的經典片段，阿Sam話邊個夠佢威，佢開紅館先例，可以有香港歌手開演唱會，阿倫則說他也開紅館先例，發明字幕機，以後大家都唔會忘記歌詞；阿Sam話自己偶像係貓王Elvis Presley有次佢開演唱會同佢近距離接觸，開心咗一年，阿倫不甘示弱，話自己偶像係許冠傑，可以同佢開演唱會，開心咗一世……演唱會就在輕鬆愉快的氣氛開始。
穿上一身銀色戰衣的Sam和阿倫以一曲《冷傲的化妝》登場，歌迷立即起哄，不停拍打手上的吹氣棒，情緒十分高漲，阿Sam 和阿倫繼一口氣唱出《Look for star》和《心思思》。阿倫和阿Sam先脫去頭上反帽，說他身上有很多武器，有帽、laser眼鏡和口水堅(領巾)要先脫掉，Sam說：「冇見成年啦！」阿倫對Sam說：「上次想同你開騷恨咗四十幾年，今次只係等咗四季，一個春夏秋冬大家又嚟紅館了。」
阿倫話大家可能以為今次同part one一樣就大錯特錯，因為衫和台唔一樣之外，歌曲亦九成不同，而且上次最前排的「窿」只只得三行，今次有四行仲加濶咗，佢哋不變嘅就係誠意，Sam仲二次創作改了《Feeling》一曲的歌詞，歌頌一班歌迷，當中歌詞包括「譚&冠為求生計又再開咪」、「感激你哋成日破費，珍惜今晚坐滿位」……阿倫說：「多謝在坐每一位流動提款機，如果了解實情苦況，臨走前出面有個箱，放低啲支票，我哋開騷前呼籲大家唔好送花，將心意全部捐俾『快樂港仁』，希望有需要的人受惠。」
阿Sam同阿倫在演唱期間向四面台的觀眾派飛吻，真係high到爆。