陳凱詠（Jace）去年因理念不同，未能與環球唱片就續約問題達成共識，「雪藏」一年後，上月終解凍復工。
雖然，期間不少唱片公司向Jace招手，但最後Jace決定自組公司做獨立歌手。整整一年沒有出歌零收入，自嘲「阿婆」性格的Jace慳得就慳，最難捱反而是心理關口，比冇錢更恐懼。Jace更向本刊透露，「失業」期間與曾執導《手捲煙》及《那年盛夏我們綻放如花》導演男友陳健朗分手了，如今一次過釐清所有關係，「雙失」傷口完全復原，重新出發。
上月20日，Jace與環球完約後出席首個公開活動，歌迷和傳媒蜂擁而至，消失一年，Jace接受《明周》訪問，終可暢所欲言，她以「磨練」來形容過去一年，「這段時間，的確唔容易嘅，我以前成日乜都講到好樂觀，個個問我都會話『冇問題呀、我handle到呀！』經歷這一年，才發覺自己終於有些經歷了，算係一個小小的磨練，令我成長了好多，人生路上可以有好多個選擇，可以一個念頭就轉去另一條路，我都要多謝自己未有行差踏錯。」
整整一年沒有出歌，Jace亦不能接任何工作，變相零收入，「接job絕對唔可以啦，冇工作冇收入，咬緊牙關囉，我又唔係一個大洗嘅人！我係嗰啲阿婆性格，唔投資唔大洗，爭在未攞個罐裝錢，反而係心理平衡要自己拿捏。好老實，香港人好習慣用工作來證明自己、定義自己，突然之間失去工作定義，我會諗自己喺度做乜？這個恐懼大過冇錢嗰種恐懼，錢冇咗盡量再用少啲囉，或者自己調節一下就OK。」
總結與環球的「分手」，Jace說：「就如拍拖一樣，到頭來唔啱，唔係任何人嘅錯，唔啱就只不過係唔啱囉，就只係分開，大家在各自的身上得到一些成長，咁就足夠了！緣份嘅嘢就係咁，這段關係，更加令自己知道，之後想要一個點樣嘅伴侶。」
一提「分手」，現實中，她與陳健朗已是半公開情侶關係，這一年男友可有全力支持她嗎？Jace靜了一下，深呼吸拋下一句：「冇咗一段時間了。」記者再追問，她說：「總之回歸自己一個人了，現階段很享受這種自由。我以前好習慣要迎合身邊所有人，好想身邊所有人都開心，但咁樣好多時變成令自己吞聲忍氣，或者唔去value自己感受，所以真係去返單身嘅時候，我係幾享受。」
要confirm一下，究竟入行以來拍過幾多次拖？Jace笑回：「突然間咁問，我竟然唔識應對！由頭到尾都係一次，（拍咗幾耐？）嘩！句句問到肉，哈哈！同入行一樣咁耐呀！有趣個位係，個時間編排得好巧妙，差不多簽約唱片公司的時候開始，跟公司幾耐，就拍拖幾耐囉，同公司散咗就散咗囉，咁樣就好齊整地理解到所有關係喇！」明白，即是由19年至22年！問Jace會否想再跟圈中人拍拖？她馬上耍手擰頭，「我絕對唔想再同圈內人拍拖了，認真地工作完，然後返回自己的私生活，都係同緊一個圈內人去相處，好似收唔到工咁呀！太攰太攰喇，休息唔到。」記者想再問，突然被Jace一句KO：「我絕對唔心急搵男朋友，亦都暫時唔想拍拖。」好，收工。
髮型：Kenki@W Workshop
化妝：Echo Makeup
場地：Sumac Restaurant and Lounge@sumacrestauranthk