Advertisement

林敏驄「紮住隻手」同鮑起靜鬥演技 食菜咁食不用看劇本

本地
2022.11.04
撰文:王志強攝影:伍敏慧

4492dd85-8484-41ec-abd1-4b4d1de98f57

林敏驄(阿驄)主演的台慶劇《下流上車族》,開播至今收視和口碑連番報捷,打低長勝軍《愛‧回家之開心速遞》之餘,上周又力壓曾志偉的《開心無敵獎門人》,貼地題材贏得網民讚賞,被捧為TVB近十年最好睇的劇集,林敏驄獲推舉為視帝大熱。

記者一見林敏驄,就稱呼他做「準視帝」,他笑嘻嘻接受:「咁犀利?」他大談怎樣轉型由笑星變賺人熱淚的感性演員,又分享怎樣「綁起一隻手」和影后鮑起靜鬥演技,他大嘆以前專注拍拖就令事業受挫,「年輕時當然揀『獎品』,現在為了『獎金』,暫時謝絕拍拖『攞獎品』。」

拍劇不看劇本

首次拍劇的阿驄先澄清執二攤傳聞,網上流傳《下流》車志明一角原本由黑仔姜皓文飾演,並已開工一日,但因接拍另一部電影而突然辭演,臨時由林敏驄頂上,他澄清絕無此事:「梗係冇,以訛傳訛,吹得就吹,吹完另一個就抄,你知傳媒係咁,懶到死。有什麼可能?開了一日工唔拍?賠都賠死佢!」

他說,當日是由TVB總經理曾志偉親自邀請他拍這齣劇的。「總經理電話留言(扮住曾志偉聲音):『想搵你拍劇,有冇興趣?』我答佢:『有,但我好貴喎。』佢就擺低兩個麻包袋嘅錢喺我門口。」

林敏驄和曾志偉早在八十年代尾合作推出多張搞笑唱片《冇有線電台》,最犀利一張賣出二十萬張,接着一起為亞視主持gag show《開心主流派》,亦是收視冠軍節目,一起拍硬檔多年,曾志偉入主TVB,當然會找林敏驄再合作。

志偉邀他首次拍劇,是否需要速遞劇本給他望一望?阿驄立刻說:「我都唔睇劇本,話俾我聽,故事大綱是什麼,劇本我到現在都未看過,一大疊擺喺度,咁厚我點睇?大佬。」

林敏驄直言拍劇不看劇本,到了埋位開工,又怎應付?「你都知冇乜嘢難倒我,沒有什麼我做唔到㗎啦,如果好的,我照做,感動的我照講;如果唔好,我就改改佢囉。」

(點擊以下圖片放大)

膊頭有感應器

《下流上車族》有不少喊位,包括林敏驄向亡父的「老小三」鮑起靜,爭回老竇神主牌一幕;阿驄因早年賣樓「落錯車」,令太太江美儀變成無樓一族,還要去做鐘點工人,博再上車,對太太深感愧疚。不少網民包括連登仔都說看到「頂唔順」流下男兒淚,觀眾大讚一向擅長搞笑的林敏驄演喊戲那麼自然催淚,令觀眾大跌眼鏡。

林敏驄分享演喊戲的心得:「去到喊位,其實很自然,沒有plan定,如果劇本到位,自自然然push你跟住情緒去,好像我以前寫那麼多情歌,好像膊頭有個sensor,一到感動就震一震,拍戲也一樣,那個mood到,就會自然流露。有些演員,尤其是新演員,會預先設計好:一會兒會喊,到說某一句時,『咇』都要『咇』出來;其實不用,這樣不夠自然,有些演員說:『尾句是什麼?講完我就喊。』如果我不說那一句呢?現實生活不會設計好,將會說什麼話,那就不真實、不自然。」

林敏驄也分享為何有時要改劇本,有一幕戲,他向江美儀表達愧疚,盡訴多年來內心屈埋的辛酸,兩夫婦互相開解,但劇本筆鋒一轉,兩夫婦突然大開玩笑,林敏驄就要求改對白。「我同美儀講:『唔係喎,一去要去盡啲,這樣個flow才順,沒理由喊完又嬉皮笑臉。』於是改成繼續感人催淚,一拍完那個鏡頭,梳頭化妝走晒出來,個個眼有淚光,他們說很好看。美儀之後周圍跟人說,這就是鮑姐所說的『射波戲』,其實是演技較量,大家很開心,酒逢知己,很難遇到這麼好的對手。」

綁起手同鮑姐鬥戲

林敏驄說接劇前已知對手有江美儀和鮑起靜,他就細心研究應該用什麼tone去演這套劇。「搞笑tone,還是實做呢?如果搞笑,我一定贏她們,她們尾燈都望不到,我講完,她們都答不到,所以我『讓你半臂』,紮住一隻手去演,同你就鬥演技,如果我唔輸,那就當贏。」

問阿驄想不想拿視帝,他說:「俾我冇所謂,唔俾啲人鬧你啫,別人覺得你得,已經贏了。」現在是網民當道的年代,網民認為阿驄應拿獎,就是民間視帝。「拍完這套劇,我同美儀講:『師奶一定喊死。』現在不止師奶喊,連登仔都喊,這才恐怖,感動到的人什麼年齡層都有,他們現在好識睇戲。」

他說在這齣劇的搞笑tone減至20%至30%,主力玩演技,以示對鮑姐和江美儀的尊重。江美儀一開始向林敏驄表示,擔心劇集反應不理想。「我叫她不用擔心,我第一次做的事情,做親都贏,我第一次寫歌,寫《這是愛》就是冠軍歌。我第一次拍電視,八八年和杜德偉做搞笑節目《點解咁好笑》,又係冠軍。我同志偉做《開心主流派》,贏到開巷啦。」

服裝:LAKH

861ecd4d-63fd-4b3b-b269-9177ecb07047

陳卓賢 姜濤 星級企業大獎2020
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹