李駿傑（Jeremy）最新單曲《唯美本尊》，找來Serrini填詞，早前拍攝MV時，對方更偷偷現身客串，令Jeremy驚喜萬分，亦因為這個緣故，Jeremy想到要找Serrini一同推出合唱版，日前他們更為此拍攝了特別版MV。
Serrini在上次在MV中客串飾演住在Jeremy樓下的鄰居，其演出成為了合唱版MV的彩蛋。Jeremy說：「當日Serrini有教我點樣去唱呢份詞，同我解釋點解咁寫，要擺咩語氣會好啲，我聽住佢唱，就覺得，啊！佢唱得好好聽啊！唔得，真係要同佢合作，所以拍完MV嗰晚就即刻WhatsApp花姐，問可唔可以合唱，然後再有同事幫忙，促成呢件事。」
合唱版MV是上回的故事延續，Serrini道：「上次客串我亂噏話自己係住樓下個女人，今次想故事延續，一個著綠色絲絨衫嘅女人返到屋企換衫，就換咗好casual T恤質地嘅裙，遇到Jeremy撳門鐘到訪。」Serrini向來鬼主意多多，性格隨和又不拘小節，拍攝這個特別版MV時，便展現了她的獨有風格，但Jeremy卻表現緊張，Serrini大爆：「頭先拍MV時，要Jeremy挨埋嚟，佢好似唔知點算好，勁緊張，好有趣！」Jeremy難為情表示：「係呀，我驚你介意呀！」Serrini當然沒有介意，Jeremy了解到Serrini的「底線」之後，也愈演愈放，本尊的氣𦦨也慢慢散發出來，與Serrini擦出前所未有的妖艷火花。
Serrini又大讚Jeremy現場錄音表現，要妖要放鬆都可以按指導即時做到，十分專業，Serrini更說：「我係幾surprise Jeremy把聲幾入咪，同埋佢一嚟到就話食咗嘢OK，可以即刻錄。監製驚佢來自男團，要跳舞，唱歌會唔會要多啲時間warm up，又唔係，一入嚟就ready，歌詞又唔使睇！」Jeremy聞言即說：「自己歌嘛！如果唱唔到好大鑊！」