Advertisement

十歲收芝娃娃生日禮物 莫韻諰讚Coco懂閱讀主人表情

本地
2022.11.04
撰文:王崇頴攝影:鍾漢平
Coco雖已十四歲,但莫韻諰仍然當牠是小朋友一樣寵愛。
Coco雖已十四歲,但莫韻諰仍然當牠是小朋友一樣寵愛。

去年參選香港小姐的莫韻諰(Vincy),雖然落敗但仍獲無綫簽約成為藝員,目前以主持明珠台節目為主;廿四歲的她,自細已喜歡狗,原本家中分別養了一隻蝴蝶犬毛毛及一隻長毛芝娃娃Coco,可惜去年毛毛突然離去,令一對姊弟從此分開,莫韻諰表示十歲時因一次偶然機會,令她遇上長毛芝娃娃Coco,轉眼間人寵相處十四年,「牠是我十歲時的生日禮物,其實自細都一直想養狗,兒時在街上看見別人帶狗散步,都會幻想自己有這樣的機會,記得有一日與家人經過寵物店,看見店內有一隻很可愛的芝娃娃,就吸引我,很想擁有及照顧牠,我就求爸爸買給我,當時屋企人要求我要盡量親自照顧牠,我當然一口答應,加上父親都知我很有愛心,最後決定買了Coco回家,當作我的生日禮物。」

Coco有了新家,也間接幫手訓練新主人,「一開始要負責帶牠出街,沖涼及剪指甲,甚至要執屎尿,不過牠真的很可愛,我不會介意。」Coco更得到主人寵幸,能夠人寵同牀,不過莫韻諰爛瞓,唔覺意踢了Coco,「因為牠性格很百厭及好動,經常會在我的牀上走來走去,記得細時我們會一起瞓覺,牠會瞓在我腳邊,試過有幾次我用腳踢到牠,牠會嬲足我一日,甚至每次看見我腳趾都會吠,又會想咬我隻腳,真係好似一個人仔一樣,有脾氣,會嬲,最後經過我幾年去氹佢,牠才放低對我雙腳的憎恨,同我雙腳做回朋友。」

除Coco外,家中原本養了蝴蝶犬毛毛,可惜去年突然離去。
除Coco外,家中原本養了蝴蝶犬毛毛,可惜去年突然離去。

去年蝴蝶犬細佬毛毛突然逝世,一家人陪Coco捱過傷痛,「牠有個細佬叫毛毛,可惜去年十三歲時已過身,兩姊弟一起相處很多年,所以毛毛離去,我覺得牠是知道的,因為牠們基本上每日都一起玩,突然間沒有了細佬的蹤影,加上屋企又少了一份熱鬧氣氛,初頭一、兩月,牠都會悶悶不樂趴在牀上,不時左望右望,應該都知發生什麼事?屋企人看見牠好像不開心都會開解佢,媽咪會跟牠說『毛毛已經過身了,去了天堂,一個開心的地方,你放心!』加上我們每日給牠更多的愛及照顧,陪伴牠渡過那段日子。」莫韻諰說Coco懂得看眉頭眼額,識閱讀她的表情,知道她何時不開心,就會靜靜陪在身邊,「雖然牠不懂跟我說話,但牠會用眼神及肢體語言來氹我,有一次我腸胃炎,痛到攤在地上,牠就站在我面前,好像問我,『你OK嗎?有冇事呀?』當時我跟牠說『OK呀,你坐低先!』之後牠居然乖乖地趴在我身邊陪伴我,真的很窩心。」

今年十四歲的Coco,年事已高亦顯老態,一隻眼睛有白內障,另一隻眼睛就患上乾眼症,所以兩眼視力都不是太好,「我們定時會帶牠看醫生及滴眼藥水,平時亦會為牠按摩,雖然不知道有沒有用,但網上資料寫經常為狗按摩,可以增進感情,又可以舒緩牠的關節,所以不妨一試。」芝娃娃出名嘈嘈閉,Coco更是出名的巴渣妹,面對大型犬非常有霸氣,「基本上佢未試過俾狗蝦,就算面對大狗,佢都覺得自己好威,甚至會衝出去吠對方,大狗反而會驚佢,我不知道牠在狗的語言中講了什麼?總之就嚇走晒其他狗。」面對同類會惡死,但牠一張可愛臉卻俘虜了人心,每次帶牠出街,途人都喜歡摸摸牠,「很多人見牠樣子可愛,就想摸牠,有一次有位小朋友走來想摸牠,想請牠食一粒狗糧,誰不知牠突然開口咬走狗糧,嚇到小朋友哭着找媽媽,當時我很過意不去,還向對方致歉。」

陳卓賢 聲夢傳奇 MIRROR
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹