何嘉莉現身捧軒仔演唱會場，好多人讚佢皮膚好，仲靚過以前。
相隔十五年，何嘉莉（Lilian）以KOL的身份再與英皇合作，嘉莉更現身捧軒仔演唱會場，Mani仲帶埋佢去慶功宴，跟久違的朋友打吓招呼，好多人讚佢皮膚好，仲靚過以前。
其實嘉莉生完細女八個月，穿住條束腰連身裙時纖腰再現，瘦過做女嗰陣，以為佢搏晒命做運動同節食，原來唔係，她說；「生完之後用咗兩、三個月嚟進補，嗰段時間肥了好多，補完之後我先開始on diet，但我冇話跟營養師餐單，只係好簡單咁就減到肥，就係夜晚六點就食晚飯，唔食澱粉質，當晚就盡量都唔好再食嘢，其實你只要試一日，第二朝起身都會發覺個肚腩細咗，之後就會愈來愈瘦，至於早午餐我都食得幾豐富，亦有食澱粉質類的食物，這種減肥方法係好輕鬆又有效。」
嘉莉幾個月前同細女拍咗個廣告，細女成個Kewpie BB得意到不得了，她說：「拍廣告時細女得四個月，可能閃光燈閃得太勁，影完之後佢兩晚都瞓得好差，所以冇俾佢曝光一排，依家大嗰咗啲又好啲嘅。雖然大仔都五歲，但仍是很黏人，所以都要花很多時間照顧他們，但我仍很想有工作，不讓自己跟社會脫節，另一半亦很支持，我覺得KOL的工作對我來說幾合適。」
嘉莉稱大仔已五歲，但仍是很黏人。
雖然好多人都期待嘉莉會出新歌，但她說：「不會了，雖然我好鍾意唱歌，但可以喺唱K滿足吓已經好開心，如果再出歌，我覺得會將我的身份混淆，所以冇這個想法了。」