有家長最近前來問我一個熱門話題，那便是「應否叫子女一日讀兩間幼稚園 」？從小朋友角度來看，我當然反對。但家長卻有她的見解要和我討論。以下為我們這個小型討論會的內容。有興趣知道結果的家長不妨細心閱讀。
趙為本人 家為一愛錫女兒的家長
家：我想替女兒申請五間幼稚園，三間免費，兩間私立。如果五間都收，我想俾佢一日讀兩間幼稚園：上午讀免費嗰間，下午就讀私立，你話咁樣做好唔好？
趙：可否解釋點解要咁做？
家：我記得天王劉德華於二○一五年都係替佢個女一日讀兩間學校，佢先後幫個女考過五間幼稚園。進行過面試之後最終被其中三間取錄。經過考慮，劉天王夫婦決定俾個女一日讀兩間幼稚園。
趙：就算佢曾經俾個女一日讀兩間，不過最後佢都係覺得麻煩，送個女轉讀一間國際幼稚園，唔知你有冇留意？
家：呢樣我無留意。不過我仍然覺得讀兩間幼稚園，對子女同埋家長都有三個好處。第一，我覺得個女可以學多啲英文同中文，如果我上午送佢去免費幼稚園，佢可以學多啲中文，下午去私立幼稚園，佢就可以學多啲英文，學多啲英文對將來考直資有用；第二，咁樣讀法可以「錢盡其用」，因為上午校唔使交學費，慳咗啲錢用嚟交下午嘅私立幼稚園，所以好抵；第三，咁樣做我可以有多啲私人時間去shopping或者去超級市場買餸，以及添加家庭用品。基於以上原因，我覺得俾個女一日讀兩間幼稚園對我同個女都有好處。
趙：唔知你有冇留意你舉出嘅三大好處除咗第一點是益女兒之外，第二同第三點都係益自己嘅。嚴格嚟講，叫女兒上午又上堂、下午又上堂，你話佢學多啲英文中文，我就認為咁樣讀法得不償失。點解呢？因為一日讀兩間幼稚園你個女會增添以下三大壓力：第一食午飯嘅壓力，要知道上午校一般喺中午十二時放學，下午校一般於一時上堂，減去了交通時間及換校服的時間，實際上，進食午飯的時間只有半小時左右。試想一個只有兩歲多的幼兒用半小時食午餐是否足夠，如不出現狼吞虎嚥的食相幾稀矣！如果在全無擋風的公園或空曠的地方進食，更加易出意外。我朋友的女兒，就因為在公園進食。嗆親而出現嘔吐情況，非常狼狽，女兒大哭之後對母親說，「媽咪我好辛苦呀，下晝我唔想返學喇！」母親見到女兒面部痛苦的表情，感嘆的點頭說，「好啦，以後都唔使返下晝啦！」
家：除了食午飯趕返下午校嘅壓力，還有其他缺點嗎？
趙：有。一日讀兩校使小朋友要適應以下四項：一，上、下午校老師嘅教法不同使他難以適應：例如上午校的老師可能非常嚴厲，下午班的卻十分自由，這樣會使小朋友無所適從；二，要兩歲多的幼兒，每日要早上適應完上午校的同學，下午又和另一班同學相處，可能非常吃力，長此下去會產生疲累與厭倦學習；三，上下午校的老師，對同一英文字嘅讀法可能不同，例如上午班老師讀body，把bo讀「波」讀成「波哋」；下午班老師可能是美國人，把bo讀作「吧」，讀成「吧哋」；兩種不同讀法，會令小朋友唔知信邊個教師好，這樣會降低幼兒對教師的信任，幼兒對自己也會失信心。四，一日讀上、下午兩間幼稚園會多啲功課，這樣會令幼兒吃不消。如果你女兒受到太多壓力，連學習也會無興趣，又怎能夠學多啲英文和中文呢？以上只是信手拈來的一日讀兩校對小朋友的四個壞處。既然讀書是你的女兒 ，我就認為你應該從他的角度來作決定，亦即是說，不應該叫佢一日讀兩間幼稚園了。
家：明白！多謝趙sir的解釋，聽落都覺得你講得有理由。