昨天接到傳媒朋友急電，他說津小議會與資助小學校長會呼籲各區校長，「在下月統一派位放榜後，減低『叩門位』數目或維持標準班額人數，今次是『溫馨提示』，期望紓緩『音樂椅』效應，讓學界在收生下跌時能夠共度時艱。」他請我作個短評。
我第一個反應是：「好難啦！」
「願聞其詳。」朋友要我解釋。
「好簡單，要小學校長唔收叩門位或者收少幾個，是強人之難。要家長唔去叩門更加難上加難，點解呢，因為香港的小學校長，從九月下旬的自行分配學位，到一月下旬的統一派位，完全沒有權力收自己喜歡的學生。因為『自行分配』用『世襲』及『計分』做標準，『統一派位』用『隨機編號』即『抽籤』做標準，兩個收生階段都由教育局做主導，不用『麻煩』校長。小學校長係在小一正式派完位，進入『叩門』這個非正式階段才可以收自己喜歡的學生。你試想想，你做校長，會放棄收自己喜歡的學生機會嗎？」
「我唔會囉，因為在『自行分配』同『統一派位』教育局派俾我那些學生我完全未見過，唔知鍾唔鍾意，『叩門』俾個機會我收一啲我鍾意、啱我學校文化嘅學生，我點會放過？」
「咁你會否收少幾個呢？」朋友問。
「其實我好難答你，我年年都『見好就收』，一定唔會收好多，除非教育局每年叫我報上叩門數目，咁就可以收少啲，如果是『溫馨提示』，好似我太太出門叫我帶把遮出街以防下雨咁，我會多謝一聲，記得就帶，唔記得就算數。」
「點解兩間議會期望減收叩門紓緩『音樂椅』效應？」
「因為小學適齡人口預算九月新學年起下跌，於一九／二○年僅五萬七千三百人，今年減少八千四百人，明年更跌至五萬五千人的谷底，如果名校收多幾個叩門生，弱勢學校便少幾個，如果少過十六個便要『殺校』，所以津小與資小校長會希望會員校長合作，共度時艱。我個人認為，除非教育局出手，否則呼籲效果成疑。」
「點解你咁肯定？」朋友追問。
「因為在民間，學位這『市場』需求甚殷，校長想收自己喜歡的學生，家長亦熱切期望替子女搵到間啱佢哋讀的學校。問題在，目前的小一收生制度，不能完全滿足校長及家長期望，而『叩門』這個民間自由收生市場卻可以，所以除了教育局，任何人呼籲也功效不大。」
「明白，多謝趙Sir嘅comment！」